Edhe pse me një lojtar më pak gati gjysmën e lojës, Manchester United ka eleminuar Arsenal nga FA Cup pas goditjeve të 11-metërshave dhe vazhdon në raundin tjetër.
“Topçinjtë” gjetën shpejt golin që në minutën e 18′ me Gabriel Martinelli, por që u anullua për pozicion jashtë loje. Në minutën e 41′, braziliani Gabriel Jesus lë fushën e lojës dhe largohet me barrelë duke nënkuptuar për një dëmtim të rëndë, që mund ta lërë jashtë fushe për disa javë.
Pjesa e parë u mbyll 0-0. Pjesa e dytë nis shumë vrullshëm. “Djajtë e Kuq” kaluan të parët në avantazh me portugezin Bruno Fernandez pas një asisti shumë të bukur të Garanacho.
Në minutën e 61′, ekipi i Amorim mbetet me një lojtar më pak pasi Diogo Dalot merr kartonin e dytë të verdhë dhe lë fushën e lojës.
Dy minuta më pas, djemtë e Artetës barazojnë shifrat 1-1 me golin e bukur të Gabriel. Në minutën e 72′, Odegaard gabon nga pika e bardhë e penalltisë dhe humb mundësinë e artë për të kaluar “topçinjtë” në avantazh.
Koha e rregullt mbyllet me shifrat 1-1, ndërsa rezultati mbeti i pandryshuar as pas 30 minutave shtesë.
Dy ekipet iu drejtuan penalltive, aty ku “Djajtë” u treguan më të saktë. Havertz gaboi për Arsenal, asnjë gabim nga 5 lojtarët e zgjedhur nga Amorim që u treguan të gjithë të saktë para pikës së bardhë.
