Epilogu i ndeshjes gjysmëfinale të Superkupës së Spanjës mes Realit të Madridit dhe Majorkës (3-0) dukej se nuk mund të ishte më i trishtë, me zënka mes lojtarëve, provokime dhe deklarata pa doreza pas përplasjes.
Por kishte edhe më keq. Pasi mbaroi ndeshja, disa tifozë të Majorkës dhe disa nga gratë e lojtarëve te Majorkës që kishin udhëtuar për në Xhedah raportuan se ishin viktima të “prekjeve” të ndaluara dhe ngacmimeve seksuale.
Një nga tifozët e Majokës që udhëtoi, tha për programin “El Partidazo de COPE” se “më e keqja nga të gjitha ishte në fund të ndeshjes ku po dilnim nga stadiumi. Na u desh të qëndronim deri pak minuta më vonë, sepse duhej të shkonim të gjithë bashkë në autobus.
Në atë udhëtim nga tribuna në autobus, i cili zgjati rreth 15 apo 20 minuta, ata (tifozët arabë) vazhdimisht na qortonin, qindra njerëz qëndronin në korridoret tona, na fotografonin pa pëlqim, madje na goditnin me shuplakë në fytyrë, duke u tallur ne, duke na bërë 3-0 me gishtat e tyre…”. Dhe shtoi se “më të keqen e kanë marrë gratë, të cilat kanë pësuar prekje të ndaluara dhe ngacmime të tjera pa pëlqimin e tyre… Është shumë serioze”.
Një nga viktimat ishte dhe Kristina Palavra, partnerja e futbollistit të Majorkës, Dani Rodríguez, e cila shpjegoi në “IB3”. “Na kanë ngacmuar. Na kanë bërë foto nga afër, dalja ka qenë shumë e keqe. Isha me vajzën e fjetur… Ishim pak të humbur se nuk kishim njeri që të na mbronte aty. Vetëm na ngacmonin”, deklaroi ajo. Palavra shpjegoi se dhe gruaja e Dominik Graif, Natalia Kalushova, gjithashtu ka vuajtur nga kjo.
