Janë zbardhur detaje të reja nga ngjarja e regjistruar mbrëmjen e të dielës në Fier, ku u plagos me armë zjarri 40 vjeçari Gledian Hoxhallari, i njohur si “Gledi”.
Si autor i dyshuar i krimit është shpallur në kërkim prej 5 ditësh 26-vjeçari Klement Beqaj, i njohur si Klejdi, teksa bashkëpunëtore në krim dyshohet edhe bashkëshortja e të plagosurit Melisa Beluli (Hoxhallari), 29 vjeçe me të cilën ishte në proces divorci.
Ngjarja ndodhi në vendin e quajtur “Kryqëzimi i Zogut të Zi”, ku Klement Beqaj shkoi në lokalin ku ndodhej Gledian Hoxhallari dhe e qëlloi atë me armë zjarri.
Sipas dëshmimtarëve që kanë qenë të pranishëm në lokal, Klement Beqaj i mbështeti pistoletën në trup dhe e qëlloi 40-vjeçarin. Mësohet se të pranishëm kur ndodhi ngjarja ka qenë edhe bashkëshortja e të plagosurit Melisa Beluli dhe fëmija i tyre 10-vjeçar, ku Beqaj i ka plagosur babain në sy të tij.
Melisa Beluli dyshohet se është e dashura e autorit Klement Beqaj dhe po ashtu dyshohet se ajo e ka nxjerrë në pritë bashkëshortin e saj, duke informuar të dashurin për lëvizjet e tij.
Pas krimit, ata janë larguar të dy drejt Patosit ku janë shpallur në kërkim nga Policia dhe prej 5 ditësh nuk ka asnjë gjurmë prej tyre.
Burime bëjnë me dije se 40-vjeçari i plagosur, Gledian Hoxhallari ndodhet në Spitalin e Traumës në gjendje kritike për jetën. Mësohet se pas një operacioni që zgjati disa orë nuk është mundësuar heqja e një plumbi në bark.
Policia e Fierit ka konfirmuar ditën e sotme se në kërkim është shpallur edhe bashkëshortja e të plagosurit, 29-vjeçarja Melisa Hoxhallari (Beluli), e cila akuzohet për veprën penale “Moskallëzimi i krimit”.
“Në vijim të informacionit të datës 05.01.2025, mbi plagosjen me armë zjarri të shtetasit G. H., 40 vjeç, në vendin e quajtur “Kryqëzimi i Zogut të Zi”, sqarojmë se si rezultat i veprimeve hetimore u bë shpallja në kërkim e shtetases M. H., 29 vjeçe (bashkëshortja e 40-vjeçarit, me të cilën është në proces për zgjidhjen e martesës). Vijon puna për lokalizimin dhe kapjen e saj, si dhe të autorit të plagosjes, shtetasit K. B., 26 vjeç.
Më datë 08.01.2025, për këta shtetas, Gjykata e Shkallës së Parë e Juridiksionit të Përgjithshëm Fier ka caktuar masën e sigurisë “Arrest në burg”, përkatësisht për shtetasin K. B., për veprat penale “Vrasja me dashje”, mbetur në tentativë dhe “Prodhimi dhe mbajtja pa leje e armëve dhe municionit luftarak”, ndërsa për shtetasen M. H., për veprën penale “Moskallëzimi i krimit”.
Materialet procedurale i kaluan Prokurorisë së Fierit, për veprime të mëtejshme.” – thuhet në njoftimin e Policisë.
