Virozat e stinës kanë prekur një numër të lartë qytetarësh në Korçë, kryesisht ata që vuajnë nga problemet me mushkërinë.
Për këtë arsye janë rritur vizitat në spitalin e Korçës, ku një pjesë e tyre që kërkojnë ndihmën e mjekut përfundojnë të shtruar në spital për shkak të simptomave që shfaqin. Mjekja pneumologe Diana Aliçkolli thekson se në këtë fillim viti kemi mbi 35 të shtruar që po marrin ndihmën e mjekëve.
“Situata e virozëve në qytetin tonë është deri diku e rënduar. Është një virozë e stinës që prek rrugët respiratore, fillon si gjendje virale dhe pastaj mund të kalojë në pneumoni dhe më astma bronkiale nga stimulimi i virusit. Aktualisht ne kemi 35 të shtruar”, tha Diana Aliçkolli – mjeke pneumologe per ‘Euronews Albania.
Shtimi i rasteve me gjendje gripale ose me komplikacione në frymëmarrje kanë rritur ndjeshëm edhe fluksin në sanatoriumin e Korçës. Për këtë arsye, mjekët kërkojnë nga qytetarët që të mos anashkalojnë simptomat e para, për ta trajtuar në kohë sëmundjen.
Në repartin e pneumologjisë në sanatoriumin e qytetin juglindor kryhen çdo ditë më shumë se 80 vizita, ku dominojnë fëmijët dhe mosha e tretë.
