Sllovakia mund të ndërpresë furnizimin me energji elektrike në Ukrainë nëse Kievi ndalon transportin e gazit rus në vendet e BE-së, ka thënë kryeministri sllovak Robert Fico.
Vendi i Evropës Qendrore, ekonomia e të cilit mbështetet shumë në gazin rus, i merr furnizimet e tij përmes territorit ukrainas nëpërmjet tubacioneve të epokës sovjetike.
Kryeministri ukrainas Denis Shmigal njoftoi në fillim të këtij muaji se, duke filluar nga viti 2025, Kievi do të ndalojë transportin e gazit rus dhe do të përdorë sistemin e tij të tubacionit vetëm për të ofruar gaz nga furnizues alternativë.
Kontrata aktuale me Moskën skadon më 31 dhjetor dhe Kievi ka deklaruar se nuk do ta rinovojë marrëveshjen.
“Pas 1 janarit, ne do të vlerësojmë situatën dhe masat e mundshme reciproke kundër Ukrainës”, tha Fico në një video-mesazh në Facebook. “Nëse është e nevojshme, ne do të ndalojmë furnizimin me energji elektrike që Ukraina ka nevojë urgjente gjatë ndërprerjeve të rrjetit.” Ai shtoi se Bralistava mund të konsiderojë hapa të tjerë hakmarrës.
