Gerry Cardinale thërret, Giuseppe Marotta përgjigjet. Përplasja mes Milan-it dhe Inter-it bëhet akoma më e nxehtë pas deklaratave të pronarit të klubit kuqezi.
Para ndeshjes së kampionatit kundër Como-s, Marotta iu përgjigj fjalëve të Cardinale-s, i cili pretendoi se Inter-i kishte shkuar drejt falimentimit pas fitimit të kampionatit me Conten. Deklarata që, siç pritej, nuk u pëlqyen aspak ambientit zikaltër.
Presidenti i Inter-it foli për ‘Sky Sport’ para ndeshjes kundër Como-s:
“Deklaratat e Cardinale-s janë të papërshtatshme, të pavend dhe të pasjellshme ndaj prestigjit të klubit tonë. Cardinale ka bërë zhurmë. Zhang është mbështetur nga Oaktree që prej dy vitesh dhe ne kemi ndjekur linja të qarta duke respektuar licencat kombëtare dhe Fair Play-in financiar. Kemi kaluar nga një humbje prej 246 milionë eurosh në 47 milionë, duke fituar ndërkohë Superkupën dhe Scudetto-n e yllit të dytë. Dua të shtoj se në Milano është vetëm një ekip që ka dy yje”.
Gerry Cardinale, pronari i Milan-it, gjatë një leksioni në Harvard Business School, analizoi situatën e klubit kuqezi që nga momenti kur ai mori pronësinë:
“Fitimi i kampionateve është pa dyshim një objektiv i rëndësishëm. Por duhet ta balancosh këtë me ‘fitimin me zgjuarsi’. Inter-i fitoi Scudetto-n vitin e kaluar dhe më pas shkoi drejt falimentimit. A është kjo ajo që duam? Për tifozët, puna ime është të fitoj kampionatin çdo vit, këtë e kuptoj. Por për investitorët e mi, puna ime është të pozicionoj Milan-in për të konkurruar për Scudetto-n çdo vit, të kualifikohet në Champions League çdo vit dhe të shkojë sa më larg në këtë kompeticion çdo vit”.
Në lidhje me merkaton e janarit, drejtuesi i lartë i Interit deklaroi:
“Nuk besoj se do të bëjmë lëvizje në janar për dy arsye: e para, skuadra është shumë konkurruese, dhe së dyti, merkatoja e janarit shpesh nuk ofron mundësi të mira.
Jemi Interi, cilësia është i lartë, dhe besoj se nuk do të ndërhyjmë. Skuadra jonë jep garanci për të ardhmen. A do të qëndrojë Inzaghi gjatë? Rezultatet flasin vetë, Inzaghi është përshtatur shkëlqyeshëm dhe ka dëshmuar se është një trajner i madh. Jam i bindur që bashkëpunimi ynë do të vazhdojë gjatë”.
