Organizata “Human Rights Watch” tha të enjten se Izraeli ka shkaktuar vdekjen e mijëra palestinezëve në Gazë duke u mohuar atyre ujin e pastër, që ligjërisht përbën akt gjenocidi dhe shfarosjeje.
“Kjo politikë, e zbatuar si pjesë e vrasjes në masë të civilëve palestinezë në Gazë, nënkupton se autoritetet izraelite kanë kryer krime kundër njerëzimit, të shfarosjes, që ende po vazhdojnë. Kjo politikë gjithashtu përbën një ‘akt gjenocidi’ sipas Konventës së Gjenocidit të vitit 1948”, thuhet në raportin e “Human Rights Watch”.
Izraeli vazhdimisht ka kundërshtuar akuzat për gjenocid, duke thënë se ka respektuar ligjin ndërkombëtar dhe se ka të drejtën të mbrohet pas sulmit të Hamasit më 7 tetor, që shkaktoi luftën.
Në një deklaratë në platformën X, Ministria e Jashtme e Izraelit shkroi: “E vërteta është plotësisht e kundërta e gënjeshtrave të HRW-së”, duke shtuar se Izraeli ka mundësuar furnizimin e vazhdueshëm me ujë dhe ndihma në Gazë.
Ndonëse raporti përshkruan mohimin e ujit si një akt gjenocidi, gjithashtu thekson se për ta dëshmuar krimin e gjenocidit kundër zyrtarëve izraelite duhet përcaktuar qëllimin e tyre për një akt të tillë. Raporti iu referohet deklaratave të disa zyrtarëve të lartë izraelitë, për të cilat thotë se sugjerojnë se “dëshirojnë të shkatërrojnë palestinezët”, e që do të thotë se mohimi i ujit “mund të përbëjë krimin e gjenocidit”.
“Ajo që gjetëm është se qeveria izraelite me qëllim po vret palestinezët në Gazë duke ua mohuar atyre ujin që iu duhet për të mbijetuar”, tha drejtorja e HRW-së për Lindjen e Mesme, Lama Fakih.
