Tirana do të luajë një ndeshje shumë të rëndësishme dhe mjaft të luftuar në transfertë ditën e shtunë. Në orën 13:30 do të udhëtojnë në Kurbin për të matur forcat me Laçin, takim i vlefshëm për javën e 19-të të Superiores.
Nuk do të jetë aspak e lehtë për bardheblutë, të cilët do të tentojnë fitoren për të mbyllur vitin me 3 pikë dhe për t’i dhënë fund rezultateve negative në këtë sezon.
Gugash Magani do të ketë disa mungesa dhe përveç Walid Jarmouni që do të udhëtojë në Francë për të bërë një ndërhyrje në sy, do të mungojnë edhe 3 futbollistë të tjerë.
Siç dihet Meta ka mbyllur këtë vit dhe do të mund të jetë i gatshëm për trajnerin peqinas vetëm në janar, ndërsa po për arsye dëmtimi do të mungojë edhe Fjoart Jonuzi. Mesfushori ka një problem në shpatull dhe në këto kushte nuk do të llogaritet ndaj kurbinasve.
Sikur të mos mjaftonin vetëm kaq, por per arsye kartonësh do të mungojë një tjetër lider i bardheblutëve. Bëhet fjalë për Gledi Micin, i cili ka plotësuar numrin 4 të kartonëve të verdhe dhe për sfidën e së shtunës do të jetë i pezulluar.
