Stuhia ka rrëzuar një pemë gjigande, rreth 56 metër të lartë, të Krishtlindjeve dhe Vitit të Ri në Rio de Zhaneiro të Brazilit.
Mediat e huaja kanë publikuar pamjet e rrëzimit të pemës gjigande dhe bëjnë të ditur se në këtë ngjarje ka gjetur vdekjen një burrë dhe janë lënduar dy të tjerë.
Struktura prej rreth 56 metra e gjatë, e montuar në një lagunë pranë Rio de Zhaneiros, u rrëzua në ujë, shkruan A2 CNN.
Mësohet se viktima dhe dy të lënduarit ishin punëtorë që kishin përgatitur pemën përpara hapjes së saj zyrtare dhe po përpiqeshin të siguronin perimetrin rreth saj, pasi zyrtarët lëshuan një alarm për motin e keq.
Mësohet se viktima është identifikuar dhe është Vinicius dos Santos Abreu, 21 vjeç. Ai u dërgua me urgjencë në Spitalin Conde Modesto Leal në Marica, një komunë në shtetin brazilian të Rio de Janeiro, 25 milje larg qytetit me të njëjtin emër, por u shpall i vdekur pas mbërritjes.
Ndërkohë dy burrat e tjerë që u plagosën, u dërguan në një spital tjetër ku thuhet se janë jashtë rrezikut për jetën.
