Drejtoria e Përgjithshme e Burgjeve ka futur në regjimin “41 biss” Klement Çalën.
Mbyllja e Klement Çalës në regjimin e ashpër u krye me urdhër të ministrit të Drejtësisë dhe me kërkesë të SPAK.
Kështu, ka shkuar në nëntë numri i të burgosurve në regjimin “41 biss” që gjendet në burgun e sigurisë së Lartë në Peqin.
Çala rezulton i dënuar për grabitjen e 4.6 milionë eurove në pistën e Aeroportit “Nënë Tereza”, në Rinas.
GJKKO në tetor 2022, dënoi me 122 vite burg 7 të pandehurit e grupit kriminal, ku për Klement Çalën u dha 20 vite burg.
Grabitja ndodhi në 9 prill e vitit 2019, ku në pistën e aeroportit “Nënë Tereza”, në Rinas, Tiranë, ku persona të maskuar, nën kërcënimin e armëve të zjarrit, vodhën një sasi të konsiderueshme vlerash monetare të cilat po ngarkoheshin në avion dhe më pas gjatë shkëmbimit të zjarrit me Policinë, mbeti i vrarë njëri prej autorëve kryesorë të kësaj ngjarjeje, Admir Murataj.
