Avokatët e 14-vjeçarit Mario Përlleshi kanë ankimuar në Gjykatën e Apelit masën e sigurisë “arrest me burg” të caktuar nga Shkalla e Parë, ku kërkojnë zbutjen e saj dhe daljen e të miturit nga qelia.
Mario Përlleshi akuzohet për vrasjen me thikë të bashkëmoshatarit të tij, Martin Cani dhe plagosjen e shokut të këtij të fundit, Luis Meçja, ngjarje e ndodhur mesditën e 18 nëntorit pranë shkollës 9-vjeçare në kryeqytet.
Ndërkohë, burime bëjnë me dije se prokurorja e çështjes, Alma Felaj ka marrë në një seancë maratonë prej 8 orësh në pyetje Mario Përlleshin në ambientet e Prokurorisë së Tiranës. Dëshmia e tij deri më tani është mbajtur në një sekret të plotë, duke mos u publikuar në media.
Gjithashtu, autori i krimit Mario Përleshi është ballafaquar dhe me disa nga të miturit e tjerë, të cilët kanë qenë të pranishëm në vendin e ngjarjes.
Në vazhdën e hetimeve është bërë edhe ballafaqimi mes të plagosurit Luis Meçja dhe kushëririt të tij të parë, i cili ndodhej aty kur ndodhi vrasja. 14-vjeçari Mecja pretendon se ka pasur një autor të dytë të dyshuar, ndërsa kushëriri i tij nuk ka identifikuar asnjë të mitur tjetër që të ketë patur thikë me vete në vendngjarje.
