Paris Saint-Germain po kalon një krizë të thellë rezultatesh në Champions League dhe, tri ndeshje para fundit, kualifikimi në fazën tjetër është në fije të perit.
Pas disfatës në fushën e Arsenalit (2-0) dhe dy paraqitjeve të dobëta në “Parc des Princes” (1-1 kundër Eindhovenit, 2-1 kundër Atlético Madrid), parizienët janë të detyruar të fitojnë në fushën e Salzburgut për të mbajtur gjallë shpresat për të kaluar ‘Fazën e Kampionatit’.
“Formula për të dalë nga ky moment është shumë e qartë. Është ajo që ju kam thënë: të krijojmë më shumë raste se kundërshtari. Nëse arrijmë të ndërtojmë 20, 25, 30 ose më shumë raste, aq më mirë. Duhet të pësojmë sa më pak gola, që kundërshtarët të kenë më pak mundësi. Statistikat tona janë shumë të mira, këto janë gjërat që përcaktojnë mundësitë tona për të shënuar dhe për të fituar. Efikasiteti lind nga kjo recetë futbolli, është puna jonë çdo ditë. Duhet të mbajmë besimin dhe të vazhdojmë të insistojmë,” deklaroi Luis Enrique në konferencën para ndeshjes.
Kundër Salzburgut, Lucas Hernandez mund të kthehet në listën e të grumbulluarve, pas dëmtimit të ligamentit kryqësor në maj, gjatë gjysmëfinales së Champions League kundër Borussia Dortmundit. Luis Enrique foli edhe për vëllanë e Theo Hernandez, Lucas:
“Nga këndvështrimi futbollistik, nuk bëhet fjalë për të thënë çfarë na mungon apo jo. Së pari mendojmë për lojtarin e dëmtuar, sepse është një moment i vështirë. Ai është me ne prej 10-15 ditësh. Ka një nivel të mirë përgatitjeje dhe, nëse grumbullohet, është sepse mund të luajë, sepse nuk jam mësuar të bëj dhurata.”
