Pavarësisht se pjesa më e madhe e plazheve këtë vit në vendin tonë ishin bosh, Qeveria vazhdon të pretendojë se në Shqipëri kanë hyrë 10 milion pasagjerë në aeroportin e Rinasit.
A është kjo një shifër prej turizmit, apo prej emigrimit masiv, kjo ha debat, por ajo që vlen për t’u theksuar është se numrin kjo Qeveri e cakton para se të përmbushet. Që vitin e kaluar, Edi Rama dhe zëdhënisja e tij, PR-istja e shquar Belinda Balluku, deklaronin se vitin e ardhshëm do të kemi 10 milion pasagjerë.
Dhe u tha u bë! Numri u përmbush 10 milion pasagjerë, madje si në kohëhn e komunizmit, plani e ka tejkaluar 100%. Balluku ka mbajtur një ceremoni propagande ditën e sotme në aeroportin e Rinasit, ku përgëzoi shokët dhe shoqet e partisë për përmbushjen e planit me sukses.
Por jo vetëm kaq! Ajo caktoi edhe numrin e pasagjerëve për vitin 2025, i cili sipas saj plani është 12 milionë, 2 milion pasagjerë më shumë se këtë vit. E me këtë Qeveri, ku në fokus ka propagandën, plani nuk dështon!
Të paktën jo në deklaratat publike dhe Balluku, si e shquar për propagandë, dhjetorin e ardhshëm (nëse do të jetë në Qeveri, ose nëse s’do e ketë çuar shefi para drejtësisë), do na dalë sërish në një podium të ngritur tek aeroporti i Rinasit për të njoftuar përmbushjen e planit.
“Në këtë aeroport janë tejkaluar të gjitha parashikimet që kemi pasur edhe në planet afatgjata. Ne duhet të punojmë fuqishëm pasi në 2025 duam që në këtë aeroport të kemi mbi 12 milionë pasagjerë dhe se kjo vjen për shkak të punës së pandërprerë të secili prej jush që ndodheni sot këtu apo atyre që janë në pistë dhe pikat e kontrollit fizik. Përveçse bëhet një e mirë e madhe edhe përmes teknologjisë, edhe mënyra profesionale e punonjësve të këtij aeroporti se si sillen me pasagjerët ka ndikuar në këtë sukses. Ky është vendi ku ne prezantojmë fillimisht Shqipërinë. Para se t’i afrohen plazheve, maleve e kulinarisë shqiptare, porta e parë ku prezantohen me vendin tonë është aeroporti i Rinasit. Janë mbi 11 milionë pasagjerë që kanë hyrë në vendin tonë deri në 30 nëntor dhe 10 milionë kanë hyrë nga Rinasi”, tha Balluku sot.
