Gjykata e Posaçme do të shqyrtojë ditën e sotme kërkesën e avokatëve të Suel Çelës, kreu i një prej organizatave kriminale të Elbasanit, i cili ka ankimuar nga arratia masën e sigurisë “arrest me burg” në lidhje me operacioni “Plumbi i Artë” të ekzekutuar nga SPAK në Maj të vitit 2022.
Suel Çela kërkon lehtësimin e masës së sigurisë, teksa për këtë dosje ai akuzohet për porositjen e vrasjes së Elton Kilës dhe biznesmenit Lulzim Masha, atentate të mbetura në tentativë.
Akuzat ndaj tij për këtë dosje u ngritën bazuar mbi dëshmitë e të penduarit të drejtësisë, Nuredin Dumani.
Ndërkohë, rreth 10 ditë më parë, SPAK e rishpalli në kërkim Suel Çelën, duke goditur grupin e tij kriminal, me 21 masa sigurie të lëshuara. Operacioni u bazua mbi bisedat e aplikacionit “Sky Ecc” dhe ndaj tij u ngritën akuza për veprat penale nga trafiku ndërkombëtar i lëndeve narkotike, tek korrupsioni e deri tek vrasjet e kundërshtarëve të tij.
