Bayerni u eliminua herët nga Kupa e Gjermanisë dhe humbi rrugëtimin për në finalen e Berlinit përgjatë të pestit precedent radhazi.
Pas disfatës 0-1 ndaj Leverkusenit, Tomas Myler reagoi shumë i nevrikosur kur u pyet për të ardhmen e tij personale.
Edhe pse Myleri nuk luajti në humbjen e së martës karshi Bajer Leverkusen (0-1), bavarezi u përgjigj pyetjeve të gazetarëve pas ndeshjes në zonën mikse të “Allianz Arena”.
Sipas 35- vjeçarit, Bajern ishte skuadra më e mirë të martën në mbrëmje: “Ne investuam shumë në fushën e blertë dhe besoj nëse thjesht i vendosni paraqitjet krah për krah, luajtëm lojën më të mirë duke pasur parasysh rrethanat”. Myler ishte më pak i shqetësuar për largimin e hershëm të Manuel Nojer, sesa për shndërrimin e dobët të rasteve nga Bajerni:
“Në fund, futbolli ka të bëjë me shënimin e golave dhe ne patëm dy ose tri situata të shkëlqyera në pjesën e parë, edhe nga goditjet standarde, por nuk shënuam. Dhe pastaj ju mund të pranoni gol kur jeni më të reduktuar në numër lojtarësh. Kjo është goxha e hidhur. Por në fund Leverkuseni fitoi dhe kaloi në një raund tjetër. Kështu është në sport”.
Kur u pyet për faktin se ai dhe klubi u eliminuan nga Kupa herët për të pestën herë radhazi dhe se kjo mund të ishte ndeshja e tij e fundit në këtë kompeticion, Myler ishte dukshëm i mërzitur. 35-vjeçari nuk kishte dëshirë t’u përgjigjej pyetjeve në lidhje me të ardhmen e tij sportive: “Unë me të vërtetë nuk e parashikova pyetjen. Me sa duket është vonë, apo jo? Paketojeni gjërat, hajde”, përfundoi Myler.
Kontrata e sulmuesit skadon në fund të sezonit. Kohët e fundit janë shtuar raportet se nuk do të ketë zgjatje. Tomas Myler nuk luan më një rol kyç në Mynih nën drejtimin e trajnerit Vinsent Kompani, por është ende një nga fituesit më të mëdhenj në raportin e pagave.
