Artim Pollozhani nuk do të vazhdojë në krye të skuadrës tregon klubi i Ballkanit. Trajneri ka paraqitur dorëheqjen pas eleminimit në Kupën e Kosovës nga skuadra e Rilindjes.
Aventura e Pollozhanit te Ballkani ka zgjatur vetëm tre muaj, pasi mori drejtimin pas largimit të trajnerit Ilir Daja, i cili kaloi te Dinamo.
Dorëheqja e Pollozhanit është pranuar nga presidenca e klubit, ndërsa ka nisur puna për zgjedhjen e trajnerit të ri.
Njoftimi i Ballkanit:
“Tifozë të dashur, meqenëse rezultatet e fundit nuk përkojnë aspak me objektivat e klubit, Artim Pollozhani ka dhënë dorëheqje nga pozita e trajnerit, menjëherë pas humbjes së sotme.
Duke i uruar Pollozhanit suksese, klubi e ka pranuar dorëheqjen e tij, ndërsa gjatë ditëve vijuese do të ju njoftojmë për timonjerin që do të vijë në krye të skuadrës”, shkruhet në postimin e klubit.
