Komuna e Zveçanit në veri të Kosovës është sulmuar me një mjet shpërthyes, që dyshohet të ketë qenë granatë dore, pak para mesnatës së kaluar.
Lajmin e ka konfirmuar për mediat kosovare zëvendësdrejtori i Policisë së Kosovës për veriun, Veton Elshani.
“Mbrëmë para mesnatës pati një shpërthim që ne dyshojmë se ishte granate dore e llojit M-75”, ka deklaruar Elshani.
Si pasojë e sulmit i janë shkaktuar dëme godinës së komunës, si dhe janë dëmtuar edhe 4 automjete, të cilat kanë qenë të parkuara aty pranë.
Autoritetet policore në Kosovë kanë konfirmuar se si pasojë e sulmit nuk ka patur të lënduar, teksa ende nuk ka një autor të dyshuar të identifikuar dhe po vazhdojnë hetimet.
Me rastin e 28 Nëntorit, festës së Pavarësisë të Shqipërisë, dje në Zveçan për herë të parë është mbajtur seanca solemne e Kuvendit Komunal. Gjithsesi, ende nuk dihet nëse sulmi ndërlidhet me mbajtjen e kësaj seance solemne.
Ky është sulmi i dytë ndaj institucioneve në Zveçan, komunë e banuar me shumicë serbe, në dy ditët e fundit, pas sulmit me granata dore në një stacion policor.
Komuna e Zveçanit udhëhiqet nga një kryetar shqiptar prej fillimit të vitit 2023, pasi serbët dhanë dorëheqje nga institucionet e Kosovës dhe i bojkotuan zgjedhjet komunale në prill të atij viti.
