Trupat e Koresë së Veriut që luftojnë përkrah forcave ruse ka të ngjarë të dërgohen në disa nga zonat më të rrezikshme të luftës, ka paralajmëruar ministri i Mbrojtjes i Koresë së Jugut, Kim Yong-Hyun.
Duke folur gjatë një seance të komisionit parlamentar të mbrojtjes, Kim tha se “lufta udhëhiqet nga Rusia dhe nga qëndrimi i krerëve të njësive të ushtrisë ruse, ata ka të ngjarë të dërgojnë togat e Koresë së Veriut në zonat më të rrezikshme dhe më të vështira”.
Bëhet e ditur se Koreja e Veriut ka dërguar mijëra trupa për të ndihmuar Rusinë në luftën e saj me Ukrainën, sipas zyrtarëve nga Koreja e Jugut, Ukraina dhe SHBA-ja.
Së fundmi, u raportua se një gjeneral i Koresë së Veriut ishte plagosur dhe disa oficerë të vrarë nga raketat Storm Shadow të ofruara nga Britania e Madhe, me të cilat Ukraina sulmoi një qendër komanduese ruse në Kursk.
Në sulm, Ukraina lëshoi një breshëri prej të paktën 10 raketash Storm Shadow, sipas zyrtarëve ukrainas dhe perëndimorë, shkruan Business Insider, përcjell Telegrafi.
Në fillim të këtij muaji, Andrii Kovalenko, kreu i Qendrës së Ukrainës për Kundër Dezinformimin, tha se trupave të Koresë së Veriut po u jepeshin vetëm “disa javë” trajnim, duke përfshirë përdorimin e dronëve të zbulimit dhe goditjes, përpara se të dërgoheshin në pozicione luftarake të drejtpërdrejta.
Në të njëjtën kohë, presidenti ukrainas Volodymyr Zelensky tha se ushtarët e Koresë së Veriut kishin pësuar humbjet e tyre të para në luftë.
Ndërkohë, Dmytro Ponomarenko, ambasadori i Ukrainës në Korenë e Jugut, deklaroi se numri i ushtarëve të Koresë së Veriut të vendosur për të ndihmuar Rusinë mund të rritet në 15,000, që do të thotë se rreth 100,000 ushtarë do të shërbejnë në rotacion brenda një viti.
Burime të njohura me vlerësimet e disa vendeve të G20 cituan gjithashtu shifrën prej 100,000.
Ndryshe, gjatë një takimi të Këshillit të Sigurimit të OKB-së të mërkurën, Kim Song, përfaqësuesi i përhershëm i Koresë së Veriut në OKB, shmangu përgjigjen e një pyetjeje të drejtpërdrejtë nga homologu i tij amerikan nëse Koreja e Veriut kishte dërguar trupa në Rusi.
Në vend të kësaj, ai tha se traktati mbi partneritetin gjithëpërfshirës strategjik midis Koresë së Veriut dhe Rusisë “përputhet plotësisht me ligjin ndërkombëtar dhe Kartën e OKB-së” dhe se vendi i tij do të “mbetet besnik” ndaj detyrimeve të traktatit.
