Gazetari Osman Stafa ka denoncuar një rast të rëndë në QSUT, ku një vajzë vetëm tre vjeçe ndodhet e shtruar prej tri javësh në spital me leuçemi akute.
Sipas Gazetarit, prindërit e vajzës janë shprehur se nuk po arrijnë dot të bëjnë kimionterapinë për të, kjo për shkak të mungesës së medikamentit.
Ndërkohë nga spitali i është thënë se janë në pritje të kontratës që do të lidhet për këtë medikament.
Apeli i gazetarit shkon edhe më tej. Ai thotë se sot është e enjte dhe ditë pushimi. Vajza do të duhet të qëndrojë edhe katër ditë në spital pa marrë kimioterapinë sepse është pushim.
Por, thotë Stafa, a pret një vogëlushe katër ditë pushimi dhe a pret ajo kur ministria të lidhë kontratën për medikamentin?
“Vogëlushja 3-vjeçare, ende pa marrë medikamentin sepse është pushim. Dhe ajo duhet të presë të hënën, që të vijë kimioterapia. Pra edhe 4 ditë të tjera.
Prisja që sot, Ministria e Shëndetësisë, Ministrja e Shëndetësisë, që deklaron në Kuvendin e Shqipërisë se mungesa e ilaçeve kimio në QSUT, është jo e vërtetë, të merrte masa, dhe t’ia siguronte “Crisantospase-n”, 3-vjeçares, por Jo.
Vogëlushja, ka tre javë sipas familjarëve, pa këtë medikament kimio. Askush nuk thote se kur do të vijë. Kjo sepse nuk është lidhur kontrata e re.
Kontrata e fundit ka mbaruar në qershor.
A pret leuçemia akute kur të lidhë Ministria kontratën e re?
A pret leuçemia akute të mbarojnë pushimet?
A ka guxim Ministria që ka për detyrë të sigurojë kimiot, ta shohë të voglën në sy. A mundet?
Nëse i ka mbetur sadopak njerëzorja brënda saj, Koçiu t’ia sigurojë sa më parë kimion, që vajza ta fillojë trajtimi e mos të humbasë më kohë.
Është vetëm 3 vjeç.”, shkruan Stafa.
Pas publikimit të këtij statusi dhe apeli nga gazetari, ka reaguar edhe QSUT e cijustifikuese thotë se për rastin e vajzës 3 -vjeçare janë ndjekur të gjitha procedurat.
“QSUT informon me përgjegjësi të plotë opinionin publik se, referuar rastit të pacientes 3-vjeçare A.L, janë kryer të gjitha procedurat mjekësore sipas protokolleve dhe vlerësimit klinik të pacientes nga mjekët që ndjekin rastin në fjalë.
Për transparencë dhe specifikën delikate që përbën rasti, pasi kemi të bëjmë me një të mitur vetëm 3 vjeç, informojmë se prej ditës së martë pacientja A.L ka patur temperaturë të lartë. Duke vlerësuar gjendjen, mjekët kanë vendosur që të shtyjnë marrjen e terapisë së kimios për të shmangur komplikime të gjendjes klinike.
Ndërkohë, pacientja mbahet gjatë gjithë kohës nën vëzhgimin e mjekëve specialistë dhe janë ata që vendosin, në bazë të protokolleve dhe konsultave, për vijimin ose jo të terapisë duke u bazuar në gjendjen faktike klinike”, shkruhet në deklaratë.
