Një operacion është duke u zhvilluar në qytetin e Elbasanit, ku mësohet se deri tani janë vënë në pranga dy ish-gjyqtarë.
Bëhet fjalë për ish-gjykatësen Pajtime Fetahu, e cila ishte me masën “arrest në shtëpi”, me akuzat për lidhjet e saj me bandat kriminale në këtë qytet.
Po ashtu, raportohet se është arrestuar edhe ish-kryetari i Gjykatës së Elbasanit Zihni Shahu.
Detajet e operacionit dhe akuzat ndaj tyre nuk bëhen të qarta.
Ky aksion është në vijim të kontrolleve të disa banesave dhe bizneseve gjatë ditës së djeshme në Elbasan.
Kujtojmë se emri i ish-gjyqtares Pajtime Fetahu doli në dosjen “Plumbi i Artë 2”. Ajo dyshohet se mund të ketë lidhje me historitë e vëllezërve Franc dhe Hajdar Çopja. Sipas njoftimit të SPAK, punonjësja e Gjykatës u ka dhënë vëllezërve informacione sekret.
Ndërsa Zihni Shahu dha dorëheqjen rreth 7 muaj pas nisjes së procesit të vettingut, pasi ndaj tij kishte filluar hetimi administrativ dhe kërkoi të përjashtohej për 15 vjet nga e drejta për të punuar në sistemin e drejtësisë.
“Në datën 20.7.2020 subjekti i rivlerësimit, përmes postës elektronike, deklaroi për Komisionin se hiqte dorë nga detyra e magjistratit, moskandidimin në detyrë për një afat prej 15 vitesh, si dhe pas këtij njoftimi do t’i drejtohej organit kompetent, KLGJ-së, sipas ligjit për dorëheqjen”, thuhej në vendimin e publikuar nga Komisioni.
KPK vuri në dukje se pas këtij vendimi u vendos ndërprerja e procesit të vettingut ndaj tij dhe Komisionoi e sanksionoi që t’i ndalohej të ishte pjesë e sistemit për 15 vjet.
