Një sherr me thika ka ndodhur pasditen e sotme në afërsi të stacionit të trenit në Durrës.
Nga konflikti në lagjen nr.4 dyshohet se ka mbetur i plagosur Gentian Bajrami, i cili është dërguar me urgjencë në Spitalin Rajonal të Durrësit.
Policia ka shoqëruar në komisariat 2 vëllezërit e dyshuar si autorë të plagosjes, Eno dhe Ivo Gega.
I riu ka marrë plagë në bark dhe ndodhet jashtë rrezikut për jetën.
“Rreth orës 18:45, në lagjen nr. 4 Durrës, dyshohet se pas një konflikti të çastit, dyshohet për motive të dobëta, shtetasit E.G, 36 vjeç dhe I. G. 33 vjeç, (vëllezër) kanë plagosur me mjet prerës (thikë), shtetasin G. B., 32 vjeç. Ndërhyrja e menjëhershme e shërbimeve të Policisë, bëri të mundur kapjen dhe shoqërimin në Komisariat, të dy vëllezërve për veprime të mëtejshme procedurale.
32-vjeçari është transportuar në spitalin e Durrësit, ku po merr ndihmë mjekësore dhe ndodhet jashtë rrezikut për jetën.”– njofton policia.
Grupi hetimor nën drejtimin e Prokurorisë po punon për sqarimin e plotë të rrethanave të rastit.
