Fshati Mançurisht në bashkinë Devoll, njihet si fshati i mollëve, por mollët që e kanë bërë të famshëm këtë fshat kanë mbetur pa shitur.
Emisioni “Fol” u ndalën në këtë fshat ku banorët thonë se magazinat janë plot me mollë por nuk ka treg për t’i shitur. Banorët thonë se problemin e kanë njëlloj si të majtë dhe të djathtë dhe se në këtë problem nuk kanë ndikim partitë.
“Kemi kultivuar mbi 20 dynym mollë, 30 dynym qepë, por nuk vijnë të pyesin sa është çmimi dhe me sa e grumbullojnë. Pikat e grumbullimit që janë bërë nuk i grumbullojnë. Molla në fillim të sezonit nisi mirë të shitej, por ra çmimi nga 40-50 lekë që shitej, arriti në 20 lekë, në mos më poshtë. Molla për lëng shkon 12 lekë kilogrami. Si do ngremë kokë ne. Ky pushtet që është ne na bie kokës që mos të ngremë kokë. Quhemi fshati i mollëve, por kush na njeh, po nuk na njohu qeveria”, tha një banor.
Një tjetër shprehet se malli iu mbetet stok që kur u bë Ballkani i Hapur.
“Na konkurrojnë shtetet e tjera, se ata subvencionojnë, por ne nuk subvencionohemi në asnjë lloj drejtimi. Shtetit i them “faleminderit shumë” që na ngre ilaçet bujqësore dhe na jep pak naftë, por dhe atë e bëjnë për të vjedhur vetë. Ngastrat nën 1 dynym tokë nuk përfitojnë, nuk futen në subvencionimin e naftës, qoftë dhe 990 metër. Ne gjysmat e ngastrave i kemi nën 1 dynym. Para gjashtë vjetësh ishte shumë më mirë se sot, u detyruam se kemi djemtë këtu, u detyruan djemtë ikën jashtë, jo se janë mirë, por të paktën punojnë. Po të filloj shitja e mollës, kthehen djemtë.”
Pronari i një frigoriferi ngreh shqetësimin se është i mbytur nga borxhet.
“Jam pronar frigoriferi, kam frigoriferin më të madh në këtë zonë. E kam bërë me lekët e mia, kam marrë në bankë 700 milionë kredi që në 2008. Vitet e para e mbushja frigoriferin me 5 mijë kuintal mollë, vetëm unë. Kam 16 vite që nuk kam ngritur kokën nga borxhet. Kam 90 dynym mollë, 60 dynym qepë dhe 40 dynym grurë dhe nuk po ngremë dot kokë. Tokën e kam me qira. Kur ankohem unë me gjithë këtë mall, po të tjerët. Vjet vetëm gjysmë dhome mbushëm me mollë, 70 milionë më shkoi vetëm korrent. Ne na i fusin këta më shumë. Mbeti molla pa shitur se erdhi molla nga jashtë. Molla italiane që vjen këtu, këtu hapin llafe se i bëjmë me pesticide dhe ata nuk i bëjnë. Për këtë vit, ata që i kanë punuar mollët, është super. Kur nuk po shkon dhe këtë vit, mos o Zot. Po u shitën mollët do i marrim lekët e dritave, po nuk u shitën do venë në lumë. Në fshat kanë mbetur 240 banorë.”
Shqetësimi i një banori tjetër është pamundësia për të marrë një traktor të ri.
“Nuk kemi mundësi që të marrim një traktor të ri. Shumica e fshatit i ka hedhur mollët. Po një fermer i vogël me se do rrojë. Shyqyr që u kanë ikur fëmija jashtë. Më mirë del të punoj argat se në tokën time. Dikur Bodja për një javë mbylli doganën, u shit i gjithë prodhimi. Shteti është rregullator dhe këtu nuk funksionon. Zoti kryeministër mos u tall me bujqit se për bujqësinë nuk ke bërë asgjë dhe mos u mundo të tallesh prapë.”
