Ditën e nesërme, në orën 09:30 do të zhvillohet seanca gjyqësore për vlefshmërinë dhe caktimin e masës së sigurimit për 14-vjeçarin Mario Përlleshaj.
Ky i fundit akuzohet si autor i vrasjes me thikë të 14-vjeçarit Martin Cani dhe plagosjen e shokut të këtij të fundit Luis Meçja, krim i ndodhur mesditën e 18 nëntorit, pranë shkollës “Fan Noli” në kryeqytet.
Fillimisht i mituri Mario Përlleshaj u arrestua nën akuzën “Vrasja me dashje e kryer ndaj të miturit” dhe “Prodhimi, mbajtja, blerja apo shitja pa leje e armëve të ftohta”. Por, ditën e sotme Prokuroria e Tiranës i ashpërsoi akuzën, duke i ngritur veprën penale “vrasjes në rrethana cilësuese”.
Nga ngjarja e rëndë, edhe autori mbeti i plagosur në krah, teksa ditën e sotme ka dalë nga spitali dhe ka shkuar në paraburgim.
Dyshohet se të miturit ishin konfliktuar fillimisht në rrjetet sociale për motive banale dhe më pas ishin konfliktuar ditën e premte në shkollë, si dhe ditën e ngjarjes në pushimin e madh gjatë mësimit. Më pas, Mario Përlleshaj dyshohet se i kishte ngritur pritë Martin Canit pas përfundimit të mësimit në një rrugicë pranë shkollës “Fan Noli”.
Ndërkohë ditën e sotme lidhur me këtë ngjarje u zhvillua edhe një protestë në kryeqytet, nga prindër të nxënësve, shoqëruar me fëmijët e tyre.
Mesazhi kryesor i prindërve dhe pjesëmarrësve në protestë ishte kërkesa për dorëheqjen e ministres së Arsimit, Ogerta Manastriliu, të cilën e konsiderojnë përgjegjëse për ngjarjen e rëndë dhe situatën e arsimit.
Prindërit i kanë lënë një afat deri në fundjavë ministres për të dhënë dorëheqjen në të kundërt javën e ardhshme kanë paralajmëruar tjetër protestë.
