Lista e drejtuesve politik të Partisë Socialiste në Qarqe ka pësuar ndryshime, vetëm pak kohë pasi u prezantuan nga kryeministri Edi Rama në Asamblenë Kombëtare të mbajtur më 8 shtator.
Burime për A2 CNN pranë selisë rozë bëjnë me dije se ministri i Ekonomisë dhe Kulturës dhe Inovacionit, Blendi Gonxhe nuk do të jetë më drejtues politik në Dibër, por do të angazhohet në zonën e Kombinatit, në Tiranë.
Ende nuk dihet se kush do ta zëvendësojë Blendi Gonxhen në Qarkun e Dibrës dhe pse është marrë ky vendim për ta zhvendosur atë në Tiranë.
Bashkë me Blendi Gonxhen, numri i drejtuesve politik të PS-së në Tiranë shkon në 4 bashkë me Erion Veliajn, Ogerta Manastirliun dhe Elisa Spiropalin, ku kjo e fundit është caktuar për të mbuluar bashkitë e vogla si Rrogozhina, Vora dhe Kavaja.
Kujtojmë se veç zgjedhjeve parlamentare që do të mbahen pranverën e ardhshme, pas dy vitesh do të mbahen dhe ato lokale, ku Erion Veliaj nuk ka më të drejtë kandidimi dhe dy emrat më të përfolur në PS për ta zëvendësuar janë Ogerta Manastirliu dhe Blendi Gonxhe. Ndoshta, Rama e ka marrë vendimin e mësipërm dhe për t’i patur të dy këta emra si drejtues në Tiranë.
