Janë zbardhur detaje të reja nga ngjarja që trondit opionin publik ditën e sotme, ku 14-vjeçari Martin Cani, u vra me thikë nga një bashkëmoshatar i tij, pranë shkollës 9-vjeçare “Fan Noli” në kryeqytet.
Mësohet se Martin Cami, së bashku me shokun e tij Luis Meçja, ishin nxënës të shkollës “Fan Noli” dhe sapo kishin përfunduar mësimin, rreth orës 13:10 dhe po iknin për në shtëpitë e tyre.
Ndërsa, autori dhe dy shokët e tij ishin nga një shkollë nga Sauku. Këta të fundit i kishin zënë pritë viktimës, në një rrugicë rreth 150 metra larg shkollës, pasi ishin konfliktuar më herët në rrjetet sociale për motive banale.
Grupi hetimor ka zbardhur dinamikën e krimit nga kqyrja e kamerave të sigurisë, ku gjithçka ka ndodhur në rreth 1 minutë e gjysmë. Fillimisht dy palët janë ofenduar me njëri-tjetrin dhe më pas, autori i ardhur me thikë me vete ka goditur disa herë në zemër dhe në bark Martin Cani.
Po ashtu, ai ka goditur me thikë në gjoks dhe shokun e Martin Canit, Luis Meçjan, teksa ky i fundit ndodhet në spitalin e Traumës në gjendje stabël. Po ashtu, edhe vetë autori ka mbatur i plagosur në krah.
Mësohet se e ëma e viktimës ndodhej në punë në momentin kur e ka marrë mësuesja në telefon dhe i ka treguar se po i çonte të birin në spital. 14-vjeçari Martin Cami u dërgua nga kalimtarët e rastit në spitalin e Traumës, por fatkeqësisht, nuk arriti t’u mbijetonte dot plagëve të marra dhe ndërroi jetë.
Burime për mediat bëjnë me dije se 14-vjeçari Martin Cani dhe autori i krimit luanin bashkë tek ekipi i Dinamos U-15. Në momentin e krimit nuk ka patur asnjë efektiv Policie në ambientet rreth shkollës “Fan Noli”.
