Forcat Operacionale në bashkëpunim me Drejtorinë për Hetimin e Narkotikëve në Policinë e Shtetit kanë ekzektuar një operacion kundër trafikut të lëndëve narkotike dhe armëve.
Autoritetet raportojnë se në kuadër të operacionit policor të koduar “Monitorimi” janë arrestuar në flagrancë 4 persona, dy prej të cilëve babë e bir.
Më konkretisht janë vënë në pranga shtetasit Ilir Dura, 54 vjeç dhe Franci Dura, 19 vjeç (babë e bir), banues në fshatin Bënçë të Tepelenës, si dhe shtetasit Mehemet Mino, 27 vjeç dhe Reshat Bakia, 27 vjeç.
Burimet zyrtare bëjnë me dije se Ilir dhe Franci Dura, janë kapur në urën e Bënçës në Tepelenë duke udhëtuar me një automjet që drejtohej nga babai dhe brenda saj ishin 3 thasë me lëndë narkotike kanabis me peshë totale 30 kg.
Ndërsa, raportohet se Mehmet Mino, që lëvizte me automjetin tip “BMW”, monitoronte rrugën ku kalonte automjeti me drogë, me qëllim shmangien e shërbimeve të Policisë.
Pas makinës me drogë, qarkullonte dhe automjetit tjetër me drejtues Reshat Bakian, ku mbante një armë zjarri kallashnikov dhe municion luftarak, po ashtu me qëllim shitjen e tyre.
Materialet procedurale i kaluan Prokurorisë së Gjirokastrës për veprime të mëtejshme.
