Është shoqëruar me tensione të forta seanca e sotme gjyqësore në Gjykatën e Tiranës për gjyqin e Dan Hutrës, autorin e vrasjes së 3 grave dhe plagosjes së 3 të tjerave brenda një ditë në vende të ndryshme të kryeqytetit.
Në seancë ishte thirr për të dëshmuar Vladimir Kurti, një i dënuar përjetë për vrasje, të cilit në mars të vitit të kaluar Hutra i ekzekutoi të motrën, Etleva Kurtin
Mësohet se Vladimir Kurti ka refuzuar të japë deklarime, teksa iu drejtua të pandehurit, që dikur kishte ndarë qelinë me të, si monstër, duke paralajmëruar se nuk e fal vrasjen e motrës së tij.
“Gjakun e motrës sime nuk e than dheu, nuk e fal. Ai është vrasës, ka futur në dhe 4 gra, refuzoj të japë deklarime përballë këtij monstre”, – ka deklaruar Vladimir Kurti në sallën e gjyqit.
Në kohën që dëshmimtari fliste, Dan Hutra është shfaqur i qetë dhe duke qeshur në kafazin prej qelqi. Seanca është shtyrë për në datën 5 dhjetor në orën 12:30, ku do të vijojë procesi gjyqësor ndaj Dan Hutrës.
Ky i fundit akuzohet për masakrën e regjistruar më 1 Mars të vitit të kaluar, ku vrau tre gra dhe plagosi tre të tjera, në tre vende të ndryshme, teksa sapo kishte dalë nga burgu për dhunimin e bashkëshortes së tij.
Në orën 12:15 të asaj dite, Dan Hutra plagosi 40-vjeçaren Marjana Gurakuqi në rrugën “Teodor Keko” në mbikalimin e Pallatit me Shigjeta.
Pas kësaj ai u largua me makinë dhe rreth orës 12:35 ka shkuar në Kodër Kamzë në banesën e ish-bashkëjetueses, ku ka vrarë Mevlute Hysa 30 vjeçe (motra e ish-bashkëjetueses së tij) dhe Hasime Dafku 30 vjeçe (e fejuara e vëllait të ish-bashkëjetueses), si dhe ka plagosur Elena Hysa, 35 vjeçe ish-bashkëjetuesja e tij dhe Kujtime Hysa, 60 vjeçe, nëna e saj.
Pas kësaj, Dan Hutra ka lëvizur në rrugën e Arbrit, Bathore, ka vijuar në rrugën “Besëlidhja” dhe rreth orës 12:48 ka ndaluar tek banesa e familjes Kurti ku ka vrarë Etleva Kurti 31 vjeç, e cila u gjet e vdekur në oborrin e banesës. Vëllain e saj Vladimir Kurtin, ai e kishte pasur shok qelie.
