Sekretari i Përgjithshëm i OKB-së Antonio Guterres u ka thënë udhëheqësve botërorë në COP29 se është koha për të “paguar, ose njerëzimi do ta paguajë çmimin”.
“Jemi në numërimin mbrapsht përfundimtar, për të kufizuar rritjen e temperaturës globale në 1.5 gradë Celsius dhe koha nuk është në anën tonë,” tha Sekretari i Përgjithshëm i OKB-së Antonio Guterres në Samitin e OKB-së për Ndryshimet Klimatike 2024.
Guterres u kujtoi udhëheqësve botërorë se ky vit parashikohet të jetë më i nxehti i regjistruar dhe deri më tani ka qenë një “masterclass në shkatërrimin e klimës”.
Ai gjithashtu vendosi tre prioritete kryesore: shkurtimet “emergjente” të emetimeve me G20 në krye, mbrojtjen e njerëzve nga “shkatërrimet e krizës klimatike” dhe “rrënimin e mureve” për financimin e projekte të klimës.
Sekretari i Përgjithshëm i OKB-së theksoi se vendet në zhvillim nuk duhet të largohen nga COP29 “duarbosh”.
“Financimi i klimës nuk është bamirësi, është një investim. Veprimi ndaj klimës nuk është fakultativ, është imperativ. Të dyja janë të domosdoshme: për një botë të qëndrueshme për të gjithë njerëzimin.”
“Familjet vrapojnë për të shpëtuar jetën e tyre përpara se të godasë stuhia e radhës. Punëtorët dhe pelegrinët, goditen nga vapa e padurueshme. Përmbytjet, që shpërthejnë nëpër komunitete dhe shkatërrojnë infrastrukturën. Fëmijët, që shkojnë në shtrat të uritur ndërsa thatësirat shkatërrojnë të mbjellat”, tha Guterres.
“Të gjitha këto fatkeqësi, dhe më shumë, po shtohen nga ndryshimet klimatike të shkaktuara nga njeriu.”
Duke i bërë jehonë komenteve të bëra dje nga drejtuesi i klimës i OKB-së, Simon Stiell, ai u tha delegatëve se asnjë vend nuk do të kursehet nga pasojat e ndryshimeve klimatike, pasi goditjet e zinxhirit të furnizimit rrisin kostot, çmimet e ushqimeve rriten nga korrjet e shkatërruara dhe kostot e sigurimeve rriten ndërsa shtëpitë shkatërrohen.
“Përkeqësimi i ndikimeve klimatike do të rrisë së tepërmi inflacionin, nëse çdo vend nuk mund të ndërmarrë veprime më të guximshme klimatike”, ka paralajmëruar zyrtari më i lartë i OKB-së për klimën, Simon Stiell.
Ai mbështeti drejtuesin e tij, sekretarin e përgjithshëm të OKB-së, António Guterres, në nxitjen e 200 kombeve të mbledhura për të arritur një marrëveshje të fortë në Cop29, veçanërisht për dhënien e 1 trilion dollarëve në vit të nevojshme për projektet për klimën në vendet në zhvillim.
“Kriza klimatike është një krizë e kostos së jetesës, sepse fatkeqësitë klimatike po rrisin kostot për familjet dhe bizneset,” tha ai.
“Le të mësojmë nga pandemia kur zinxhirët e furnizimit u shkatërruan,” tha Stiell. “Financimi i klimës është sigurim global i inflacionit.”
“Energjia e lirë dhe e pastër mund të jetë themeli i ekonomive tuaja. Do të thotë më shumë vende pune, më shumë rritje, më pak ndotje që mbytin qytetet, qytetarë më të shëndetshëm dhe biznese më të forta.”
Së fundi, ai bëri një referencë delikate për zgjedhjen e fundit të mohuesit të ndryshimeve klimatike, Donald Trump si president i SHBA-së: “Këto nuk janë kohë të lehta. Procesi ynë është i fortë dhe do të zgjasë. Në fund të fundit, bashkëpunimi ndërkombëtar është e vetmja mënyrë se si njerëzimi i mbijeton ngrohjes globale.”
Drejtuesja e WMO Celeste Saulo thotë se rritja e temperaturave nuk është një surprizë
Dje, Organizata Botërore Meteorologjike (WMO) paralajmëroi se viti 2024 ishte në rrugën për të qenë viti më i ngrohtë i regjistruar. Bota po nxehet në mënyrë të rrezikshme.
“Nuk është një surprizë. Dhe ne duhet të pranojmë se shkencëtarët kanë folur për këtë për shumë vite – më shumë se 30 vjet në fakt – dhe se ajo që është e habitshme është ritmi i ngadaltë i reagimit dhe veprimit,” tha ajo.
Samiti ka nisur më 11 nëntor dhe do të vazhdojë deri më 22 nëntor 2024 në Baku, Azerbajxhan./Monitor
