Kreu i Njësisë së Krimeve Ekonomike dhe Fiskale të Madridit, Óscar Sánchez Gil është arrestuar pas një megaoperacioni të policisë spanjolle.
Óscar Sánchez Gil dhe gruaja e tij, dyshohet se ishin të lidhur me një organizatë të fuqishme të trafikut të drogës, e cila ishte goditur së fundmi nga kolegët e agjentit të Krimeve.
Mediat spanjolle raportojnë se komandanti i Policisë, Óscar Sánchez Gil kishte fshehur 20 milionë euro pas një muri në shtëpinë e tij në Alcalá de Henares në Madrid dhe një milion euro të tjera në zyrën e tij. Tani po hetohet edhe për pasurinë që ai mund të ketë në formën e kriptovalutave.
Gjatë operacionit, u arrestua edhe bashkëshortja e tij, teksa të dy akuzohen për pastrim parash dhe ryshfet.
Óscar Sánchez Gil ishte emëruar vite më parë në seksionin e Narkotikëve të Brigadës Qendrore të Policisë Kombëtare të Njësisë së Drogës dhe Krimit të Organizuar dhe aktualisht mbante postin e shefit të Seksionit të Krimeve Ekonomike në Policinë Kombëtare.
Arrestimi i tij ka shkaktuar një habi të madhe tek kolegët e tij, të cilët kishin vlerësim maksimal për të në aspektin profesional. Ata janë shprehur se Gil ishte një person i rezervuar dhe nuk fliste shumë, por kishte një karrierë të shkëlqyer në Polici.
Sqarohet se paratë e sekuestruara nuk ishin të organizatës së trafikut të drogës, por ishin përfitime të marra nga çifti i policisë për rolin e tyre. Hetimi ndaj tij nisi disa muaj më parë dhe agjentët siguruan përgjime dhe telefonata duke grumbulluar mjaftueshëm prova sa për ta vendosur në pranga.
Më 6 nëntor, agjentë të Policisë Kombëtare dhe zyrtarë të Shërbimit të Mbikëqyrjes Doganore të Agjencisë Tatimore përgjuan një kontejner në portin e Algeciras që transportonte rreth 13 ton kokainë. Një sasi historike kjo për Spanjën dhe e dyta më e madhe e kapur në portet e Europës. Kontejneri me drogë vinte nga vendet e Amerikës Latine dhe kokainë si zakonisht ishte fshehur nëpër banane.
Vlera e mallit, nëse do të shitej do të kapte vlerën e 780 milionë eurove. Po ashtu, sipas mediave spanjolle, pas këtij trafiku qëndronte Karteli i frikshëm Ballkanik, i cili bashkon organizata nga vende të ndryshme të Evropës Lindore. Përfshirë edhe grupet shqiptare. Kjo organizatë, konsiderohet ndër më të rrezikshmet në Europë. Trafiku i 13 ton kokainë ishte bërë përmes kompanisë e importit të frutave (Abadix Fruits). Ishte një kompani që dyshohet se shërbente si mburojë për rrjetin.
Pas zbulimit u bënë 5 aksione në zonën e Algeciras – 4 në Alicante dhe provincat rreth saj, dhe 1 në Madrid. Banda u shkatërrua por u zbuluan detaje që e lidhnin grupin me Policinë. Nga përgjimet, u zbulua se roli i Gil ishte që të siguronte bandat për shkarkimin e kokainës në portet e Spanjës pa asnjë problem apo kontroll nga Policia. Edhe pse është e arrestuar, gruaja e tij nuk kishte asnjë komunikim me organizatën në fjalë, por edhe vetë si oficere policie kishte njohuri për aktivitetin që kryente partneri i saj.
Gil kishte përfituar nga përvoja e në seksionin e Narkotikëve në Brigadën Qendrore të Policisë Kombëtare, duke rënë në kontakt me kartelet dhe kishte marrë në dorë edhe çështjet hetimore për anëtarët e rrjetit të drogës.
Sánchez Gil gjithashtu shkonte shpesh në llozhet “VIP” të stadiumeve të Atlético de Madrid dhe Real Madrid ku dyshohet se mund të bënte “biznes” me personazhet e botës së krimit që ndodheshin gjithashtu në stadiume për të parë ndeshjet. Për të gjitha këto shërbime, merrte para që detyrohej t’i fshihte në banesën dhe në zyrën e tij pasi nuk mund t’i deklaronte në bankë.
