Bankers Petroleum Albania, kompania e përpunimit të hidrokarbureve është prodhuesi më i madh i naftës në vend. Njëkohësisht edhe një nga ndotësit më të mëdhenj në zonën e Patos-Marinzës. Por ndotja e denoncuar nga banorët është shoqëruar në vazhdimësi edhe nga prania e mbetjeve të rrezikshme, për të cilën dy vite më parë ky subjekt do të gjobitej nga IKMT në vlerën 20 milionë lekë për mosrespektim të kushteve të lejes së mjedisit për largimin e mbetjeve të rrezikshme, të cilat kishin kontaminuar zonën.
Por kjo gjobë duket se nuk ndikoi aspak në përmirësimin e gjendjes, sepse sot, dy vite më vonë ajo çfarë ndodh brenda kompanisë është e ngjashme me situatën e vitit 2022, gjë që e tregon edhe kjo video e cila ra në duart tona pak ditë më parë. Në këto pamje të regjistruara me celular, shihet qartë djegia që i bëhet mbetjeve të rrezikshme, të cilat gjenerohen nga aktiviteti i përditshëm i kësaj kompanie.
Një process, që bëhet jashtë çdo kriteri mjedisor. Shkarkimi i gazeve toskike në atmosfere direkt nga dhoma e djegies, edhe pse supozohet se dera nuk duhet të hapet absolutisht gjatë procesit. Inceneratori në fjalë është i vendosur në mes të hiçit, rrethuar nga mbetje të rrezikshme, të hedhur në grumbuj pa asnjë lloj kriteri dhe punëtorë pa asnjë lloj mase mbrojtëse.
I pyetur për këtë problem, nëndrejtori i kompanisë, Kastriot Muskaj e mohon se inceneratori punon, por deklaron se është ndalur me kohë, edhe pse në video duket qartë që është i ndezur. Ndërsa Leondard Bejko, inxhinieri i mjedisit nuk jep asnjë prononcim për këtë thyerje ligji. Ndërkohë, inceneratori vazhdon të punojë në kundërshtim me ligjin./Emisioni “Piranjat”
