Eksperti i ekonomisë Gjergj Buxhuku tha në MCN se ka një valë të madhe penalitetesh nga arbitrazhi ndërkombëtar ndaj shtetit shqiptar.
Sipas Buxhukut kjo vjen së pari për shkak të mungesës së demokracisë në vend, së dyti për shkak të korrupsionit dhe së treti për faktin se përfaqësues të institucioneve mund të lidhen me interesa okulte, duke i ndarë paratë me subjektet private.
Ai tha më tej se Qeveria bën një “luftë” për 20 milion euro për çështjen e pensioneve, ndërkohë që shpenzon 10 herë më shumë kot, duke humbur gjyqet në arbitrazh me kompanitë private.
Buxhuku: Shifra nuk është e plotë se ka ende disa çështje të tjera në arbitrazh që janë në shqyrtim dhe nuk dihet sa do shkojë, siç është ajo që ishte në Portin e Durrësit për kalatën problematike me gjermanët. Sipas disa informacioneve u zgjidh në një mënyrë duke paguar. Shohim valë të madhe penalitetesh nga arbitrazhi ndërkombëtar ndaj shtetit shqiptar. Një pjesë të rëndësishme e zë çështja e Beccheti-t, e mbylljes së Agon Channel.
Është shumë e dhimbshme, të bëhet gjithë kjo luftë për 20 milionë euro rritje pensionesh që janë në rangun më të ulët më të ulët të pensioneve në rajon dhe të shpenzosh 10 herë më shumë kot, kjo është e dhimbshme. Nuk di qeveri të tjera të jenë përballur më ketë këtë mënyrë me penalitetet ndërkombëtare.
Në bazë të analizave që kemi bërë në vazhdimësi shohim 2 kategori. Kategoria e parë është ajo që flet qartë për mungesën e demokracisë në vend. Shohim raste që merren nisma nga qeveria që në mënyrë subjektive, pa e menduar, pa iu futur faktit që ka përgjegjësi që nuk janë vetëm morale, qeveritë shqiptare mendojnë se mund të bëjnë gjithçka, të shkelin interesat e qytetarëve dhe biznesit. Këtu futen qytetarët dhe investitorë të huaj. E para është mungesa e demokracisë, sepse institucionet gjyqësore nuk ruajnë baraspeshën.
E dyta korrupsioni dhe mungesa e profesionalizmit.
E treta është që me qëllim institucionet bëjnë veprime të tilla. Përfaqësues të institucioneve shtetërore të rëndësishme mund të lidhen me interesa okulte të zeza, me grupime të caktuara private, vënë në lojë institucionet e shtetit shqiptar për të bërë veprime që lehtësisht mund të merren dhe përdoren si prova nga gjykatat ndërkombëtare nga subjekti privat dhe shteti të humbë çështjet në gjyq. Nëse vërtetohet ndahen paratë.
Më tej Buxhuku tha se rrezikojmë të penalizohemi në arbitrazh edhe me çështjen e inceneratorëve.
Buxhuku: Në çështjen e djegsave jemi në fijen e perit për t’u penalizuar. Mesa shoh veprimet janë të tilla, të paktën para se të bëhej shumë e madhe politikisht çështja, që pala koncesionare të listonte dhe ajo si Beccheti një listë të gjatë, të ndërhyrjeve, të shkeljeve të ligjit nga palët shtetërore që ta kishte kartë rezervë në moment që mund të përplasej.
