Një shqiptar është dënuar me tre vjet burgim nga drejtësia në Britaninë e Madhe, pasi akuzohet se ka rrahur brutalisht një angleze, pas një debati mes tyre.
Bëhet fjalë për shqiptarin Emiljano Cakraj, teksa sipas policisë britanike, partnerja e tij, pretendon se ai e ka goditur me grushta dhe ka tentuar ta mbysë. Ngjarja ka ndodhur në 23 janar të këtij viti.
Cakraj e ka goditur disa herë me grusht në kokë partneren dhe pasi i futi duar në fyt tentoi që ta vriste. Mediat vendase raportojnë se më pas, ajo iu lut Cakrajt që ta çonte në spitalin King’s Mill, duke i premtuar se mjekëve do t’u thoshte se kishte rënë nga shkallët.
Ata hipën në makinë, por ai kaloi pranë spitalit dhe nuk u ndal që ta linte të renë që të merrte mjekim.
Në atë moment gruaja, e cila ishte në sediljen e pasme, filloi të mendonte se Cakraj do ta çonte diku për ta vrarë.
Kështu që vendosi të shtirej si e vdekur. I panikosur, Cakraj u fut në një parking dhe thirri dikë që e mori bashkëjetuesen e tij dhe e çoi në spital. Pasi e reja shkoi në spital, tregoi gjithçka duke sjellë kështu edhe arrestimin e shqiptarit.
Përveçse e kishte dhunuar, Cakraj e kishte përndjekur edhe në rrjetet sociale nëpërmjet llogarive të rreme.
