Çudirat në futbollit shqiptar nuk kanë fund. Pas Vlorës dhe Korçës, klubi i Tiranës, tashmë degdiset drejt Lushnjës. Një situatë qesharake deri në absurditet teksa mungesa e një stadiumi në kryeqytet ka bërë që bardheblutë sa herë janë pritës, të kërkojnë një fushë të lirë.
Klasikja ndaj Vllaznisë do të luhet në stadiumin “Roza Haxhiu”. Një nga ndeshjet që gjithmonë garanton emocione dhe në tribuna është zhvendosur 85 km larg kryeqytetit dhe në një fushë që lë shumë për të dëshiruar.
Këtë shqetësim e kanë shprehur dhe dy trajnerët në konferencën për shtyp të cilët mes të tjerash e kanë cilësuar një çmenduri, zhvillimin e ndeshjes ne Lushnje.
“Shqetësues shumë po më shumë duket qesharak pak. Ndeshja më e rëndësishme, nuk është normale të luhet në fushë si Lushnja sepse qyteti dhe klubi meriton respekt, po ne duke luajtur ndeshje miqësore para disa muajsh e kemi parasysh si janë kushtet e fushës, por e kam thënë dhe javë të tjera që unë dhe lojtarët kemi për detyrë të luajmë futboll ku na çojnë, pas ndeshjes duhet të bëjmë analizat. Na vjen keq sepse kemi pasur tre ndeshje brenda dhe asnjë nuk kemi luajtur në fushën tonë. Çdo javë jemi me çantën për të gjetur fushën, stadiumin, nuk është justifikim po nuk është normale që një ditë para marrim vesh ku do të luajmë”, u shpreh Blendi Shkëmbi.
Teksa trajneri Brdariç u shpreh: ‘‘Është një çmenduri, deri dje në darkë nuk e dinim ku do luanim. Tani kanë bërë marrëveshje për të luajtur në Lushnjë, në informacionet që kemi fusha nuk është në kushtet e duhura, çfarë të presim? Ne do presim një ekip që punon, të jemi fizikisht dhe psikologjikisht sa më të fortë. Dhe të kuptojmë se luajmë me këto kushte, të kuptojmë se është ndeshje Klasike dhe ndeshjet kundër Tiranës janë gjithmonë të veçanta, mezi po pres ta luajmë. Duam të kemi çdo gjë nën kontroll edhe pse kushtet janë të vështira”.
