Policia e Korçës ka arrestuar një 39-vjeçar, i cili kishte futur kontrabandë nga Greqia një sasi të konsiderueshme ilaçesh për t’i shitur në farmacinë që administronte si biznes familjar.
Në kuadër të operacionit policor të koduar “Relations” është vënë në pranga shtetasi B. M., teksa është proceduar në gjendje të lirë dhe bashkëshortja dhe vjehërri i tij, shtetasit R. Z., 36 vjeçe dhe N. Z., 64 vjeç, të tre banues në Bilisht.
Sipas autoriteteve policore, i arrestuarit kishte kontrabanduar nga Greqia 1637 kuti me ilaçe si dhe 83 steka me paketa me cigare, të cilat u gjetën në banesën e vjehrrit të tij.
“Nga hetimet e deritanishme dyshohet se shtetasi B. M. kontrabandonte ilaçe nga Greqia, për t’i shitur në biznesin e familjes, farmacinë ku punonte bashkëshortja e tij. Nga kontrollet në banesën e shtetasit N. Z., përveç 1637 kutive me ilaçe, pa pullë fiskale, u gjetën dhe 83 steka me paketa me cigare, të cilat dyshohet se janë të kontrabanduara, sepse dhe ato nuk ishin të pajisura me pullë fiskale.” – thuhet në njoftimin e Policisë.
Materialet procedurale i kaluan Prokurorisë së Korçës për veprime të mëtejshme.
