Prokuroria e Durrësit ka vendosur në sekuestro 102 kontejnerët me mbetje industriale, që dyshohet se përmbajnë lëndë të rrezikshme. Ky vendim është marrë pas ankorimit të anijes “Moliva”, e ngarkuar me rreth 2100 ton mbetjesh të rrezikshme, mëngjesin e sotëm në Portin e Durrësit.
Në vendimin e firmosur nga dy prokuroret Suela Beluli dhe Mediana Meta thuhet se mbetjet e sekuestruara të depozitohen në një vënd të sigurtë si përsa i përket sigurisë mjedisore dhe asaj fizike, nëpërmjet monitorimit të kamerave 24 orë. Gjithashtu, bëhet e qartë që aktuslisht kontejnerët që qëndrojnë në gjendjen që janë dhe të mos hapen.
“Të gjithë subjeketet e ngarkuara me zbatimin e këtij vendimi të nënshkruajnë në procesverbalin e sekuestrimit, në të cilin të përshkruhen në mënyrë të detajuar të gjitha veprimet që do kryhen në ekzekutim të vendimit dhe përshkrimi i saktë i sendeve. Të merren masa që sendet e sekuestruara të depozitohen në një vënd të sigurtë si përsa i përket sigurisë mjedisore dhe asaj fizike, nëpërmjet monitorimit të kamerave 24 orë. Sendet esekuestrua të mbahen në gjendjen që janë pa u proceduar me hapjen e tyre. Praktika e mbajtur për ekzekutimin të dërgohet menjëherë në Prokurorinë pranë Gjykatës së Shkallës së Parë të Juridiksionit të Përgjithshëm Durrës.” – thuhet në vendimin e Prokurorisë së Durrësit.
Pluhuri i dyshura, i njohur me siglën EAF, përmban përqindje të lartë metalesh si plumbi dhe kromi dhe mbetje të tjera kimike që shkaktojnë kancer. Anija është ankoruar rreth 1.5 milje larg Portit të Durrësit.
Deri më tani, Qeveria ka tentuar ta fshehë përgjegjegjësinë, teksa ende nuk dihet se çfarë do të bëhet me mbetjet e rrezikshme. Pak ditë më parë, drejtuesi i organizatës mjedisore “Basel Action Network” (BAN), me qendër në SHBA, iu drejtoi një letër të dytë ministres së Mjedisit dhe Turizmit, Mirela Kumbaro Furxhi, dhe koordinatores për Konventën e Bazelit në Shqipëri, Elvana Ramaj, ku iu bëri thirrje për transparencë në procesin e hapjes dhe testimit të kontejnerëve me mbetje.
Eksporti i dyshuar i mbetjeve të rrezikshme nga Shqipëria u denoncua më 5 gusht nga organizata mjedisore “Basel Action Network”, e cila ngriti alarmin se një anije gjigante kontejnerësh e linjës “Maersk” u zhduk në fund të korrikut nga radarët afër Cape Town në Afrikën e Jugut, pas një sinjalizimi të bërë nga ajo tek autoritetet vendase.
Më pas u zbulua se mbetjet e dyshuara si të rrezikshme ishin prodhuar nga gjiganti metalurgjik “Kurum” dhe janë eksportuar nga kompania “Sokolaj shpk” në Durrës, në bashkëpunim me G.S. Minerals në Kroaci.
Tajlanda, destinacioni i mbërritjes, refuzoi importin pas sinjalizimit për mbetjet e rrezikshme, të cilat ishin nisur nga Durrësi në fillim të korrikut dhe që besohet se vijnë nga hiri i oxhaqeve metalurgjike elektrike.
Partia Demokratike pretendon se mbetjet e rrezikshme janë në një sasi të konsiderueshme që nuk mund t’i prodhojë dot vetëm kompanian “Kurum”, duke ngritur dyshimet se shteti shqiptar është përfshirë në një trafik ndërkombëtar të mbetjeve të rrezikshme.
Prokuroria e Durrësit ka nisur një hetim për këtë skandal, ku mbetet të shihet se sa do të shkojnë përgjegjësit kryesor para drejtësisë.
