Interpol Abu Dhabi ka konfirmuar arrestimin e Durim Bamit, i cili është ndaluar në Dubai të Emirateve të Bashkuara Arabe që më 21 Tetor, pasi është shpallur në kërkim ndërkombëtar nga SPAK.
Kjo është hera e dytë që Durim Bami arrestohet nga policia e Dubait, pasi herën e parë ai u ndalua në muajin qershor, por më pas mundi të lirohet nga gjykata e Dubait, pavarësisht se ish-zyrtarë të Ministrisë së Brendshme premtuan sjelljen e tij para drejtësisë.
Lajmi për arrestimin e Durim bamit u raportua pak ditë më parë në media, teksa tashmë ka ardhur edhe konfirmimi zyrtar. Burime për mediat bëjnë me dije se ai do të deportohet në Shqipëri, me të njëjtat procedura si në rastin e Plaurent Dervishajt dhe Julian Meçes.
SPAK ka lëshuar që në muajin maj një mandat arresti për Durim Bamin si i përfshirë në kultivimin e parcelave të drogës në zonën e Fushë-Krujës, sigurimin e kushteve për të vrarë ish-deputetin e PS-së në Lezhë, Arben Ndoka, si dhe sigurimin e kushteve për të vrarë dy miqtë e Ervis Martinajt, Erigers Mihasin dhe Hektor alias Tori Xheçuka.
