Një mësuese në një shkollë 9-vjeçare në Tiranë ka lajmëruar prindërit e nxënësve të klasës së saj kujdestare pasi është identifikuar një substancë që ka formën e një çamçakëzi dhe që përdorej nga disa nxënës.
Mësuesja ka konstatuar se nga përdorimi i këtij “çamçakëzi” fëmijët pësojnë një gjendje përgjumjeje dhe është e dëmshme.
Mësuesja e shkollës “Naim Frashëri” ka lajmëruar prindërit e klasës së saj kujdestare përmes grupit të WhatsApp-it.
“Të nderuar prindër, po ndaj me ju një problem të evidentuar nëpër shkolla. kjo është një lloj droge që po qarkullon si çamçakëz por ka pasoja, jep gjendje gjumi me sytë hapur. Duhet të jemi të gjithë vigjilent të ndihmojmë njëri tjetrin për shëndetin e fëmijëve”, shkruan mësuesja.
Pas denoncimit në rrjete sociale nga gazetari Mentor Kikia, Policia ka nisur menjëherë verifikimet se për çfarë bëhet fjalë.
