Drejtësia italiane ka dënuar me 12 vite burgim shqiptarin Klajdi Mjeshtri, duke e shpallur fajtor për veprën penale “vrasje nga pakujdesia”.
I riu shqiptar akuzohet për dhunimin deri në vdekje të zjarrfikësit 34-vjeçar italian Giuseppe Tucci nga Foggia, të cilin e sulmoi barbarisht jashtë një diskoteke në Frontemare të Riminit mbrëmjen e 12 Qershorit të vitit 2023. Tucci vdiq në spital pak ditë pas ngjarjes.
Sipas hetuesve, gjithçka ndodhi pas një shakaje që zjarrfikësi 34-vjeçar bëri ndaj të dashurës së Klajdi Mjeshtrit. Tucci ishte në diskotekë me një mik, dhe dyshja u nxorën jashtë nga Mjeshtri që punonte si roje. Fillimisht u larguan, por më pas Tucci tentoi të rifutej nga hyrja e dytë e diskotekës.
Ai nxor sërish jashtë nga punonjësit e sigurisë, por në këtë moment Mjeshtri e ndoqi dhe e rrahu barbarisht jashtë lokalit, me të paktën 5 grushta në fytyrë e kraharor.
Gjyqtari i seancës paraprake hoqi akuzën e vrasjes me dashje për Klajdi Mjeshtrin, duke mos pranuar pretencën e Prokurorisë që kërkoi 20 vite heqje lirie për shqiptarit.
Prindërit dhe të afërmit e viktimës Giuseppe Tucci, janë tronditur kur mësuan dënimin. Sipas mediave italiane, në momentin kur u formulua dënimi, familjarët e viktimës shkaktuan momente tensioni në sallën e gjyqit. Të gjithë iu sulën Mjeshtrit, i cili qëndroi i heshtur në kafazin e qelqtë edhe pse familjarët e viktimës iu afruan dhe po i bërtisnin. Për shkak të tensioneve, shqiptari më pas u largua nga seanca.
“Do të të japin një çmim për vrasjen që ke bërë”, apo “Në Shqipëri do kishte vdekur tani”, ishin disa nga fjalët që familjarët i thanë shqiptarit.
Babai Klaudio dhe nëna Lella kundërshtuan hapur vendimin e gjyqtarit duke iu drejtuar me fjalët: Nëse jeni baba, vijeni dorën në zemër! Dënimi është për vrasës dhe kriminelë. Është e pamundur që një vrasës, që na vrau djalin pa mëshirë, t’ja hedhëkështu. Unë nuk e kuptoj ligjin, por 12 vjet është një tallje për prindërit dhe për të gjithë Italinë e dinim se asnjë dënim nuk do të na e kthejë djalin tonë, por e besuam.
Ndërsa nëna e la veten të qante e dëshpëruar duke thënë: E vranë për herë të dytë. Jeta e djalit tim nuk vlen 12 vjet. Çfarë do t’i them djalit të tij adoleshent kur t’i shpjegoj dënimin?
Prentendime kishte edhe avokati i të ndjerit, njëherazi dhe xhaxhai i tij.
“Për mendimin tim ishte vendim shumë i gabuar. E vetmja gjë që mund të them është se ky vrasës, kur të dalë nga burgu dhe të kthehet në shtëpi, do të jetë në të njëjtën moshë me Xhuzepenë. Por nipi im nuk do të kthehet më në shtëpi.”
