Ndërsa gara presidenciale 2024 hyn në fazën e saj përfundimtare, sondazhet e fundit tregojnë vrullin e ish-presidentit Donald Trump në garën e tij kundër zv.Presidentes Kamala Harris. Trump ka mbajtur shifra të forta sondazhesh për dy javë rresht, duke përfituar nga tendencat e favorshme.
Me afrimin e shpejtë të ditës së zgjedhjeve (5 nëntor), të dyja fushatat po punojnë për të fituar mbi votuesit e mbetur të pavendosur në shtetet kyçe të fushëbetejës, ku të dhënat e sondazheve tregojnë një garë jashtëzakonisht të ngushtë.
Këtë javë, fushatat përdorën strategji të ndryshme për të ndikuar këta votues. Ekipi i Harris rriti prezencën mediatike, duke investuar shumë në reklamat dixhitale dhe televizive, ndërsa thirrja i drejtohej votuesve me ngjyrë.
Zëvendëspresidentja e përfundoi fushatën e javës në Michigan, duke bërë ndalesa në Grand Rapids përpara se të organizonte ngjarje në Lansing dhe Oakland County, pranë Detroitit.
Ndërkohë, Trump pati një shpërthim mediatik, duke marrë pjesë në intervista me media miqësore, duke shmangur ato më pak të favorshme. Këtë javë, ai e përqëndroi vëmendjen te hispanikët.
Të enjten, ai pati një takim me bashkë-prezantuesin e Fox & Friends, Lawrence Jones në një dyqan berberi në Bronx, u takua me bordin editorial të Wall Street Journal dhe dha një intervistë video me George “Tyrus” Murdoch për OutKick. Ai foli gjithashtu në darkën e bamirësisë Al Smith.
Të premten, ai u shfaq në Fox & Friends, iu bashkua The Dan Bongino Show dhe regjistroi një intervistë me mundësin Mark Calaway përpara se të shkonte në Michigan.
Sondazhi i Kolegjit Emerson (14-16 tetor)
Një sondazh i ri nga Kolegji Emerson, i kryer nga 14 deri më 16 tetor midis 1000 votuesve të mundshëm, tregon se gara është shumë e afërt. Harris mban një epërsi të vogël me 50 për qind të votave, ndërsa Trump ndjek nga afër me 49 për qind. Kjo ndarje pothuajse e barabartë reflekton një elektorat shumë të polarizuar, me të dy kandidatët që punojnë për të fituar mbi votuesit e pavendosur në javët e fundit kritike.
Sondazhi i Universitetit Fairleigh Dickinson (8-14 tetor)
Një sondazh nga Universiteti Fairleigh Dickinson, i kryer nga 8 deri më 14 tetor me 755 votues të mundshëm, tregon se Harris kryeson me 3 pikë, 50 për qind mbështetje krahasuar me 47 për qind të Trump. Ndërsa Harris ruan një epërsi të qëndrueshme, sondazhi nxjerr në pah qëndrueshmërinë e Trump në mbajtjen e mbështetësve të tij kryesorë. Në këtë sondazh, gabimi është +/-3,5 pikë përqindje.
Sondazhi i Fox News (11-14 tetor)
Në të kundërt, një sondazh i Fox News i kryer nga Beacon Research/Shaw & Company Research nga 11 deri më 14 tetor midis 870 votuesve të mundshëm tregon se Trump kryeson me 2 pikë, 50 për qind mbështetje krahasuar me 48 për qind të Harris. Kjo përfaqëson një ndryshim të dukshëm drejt Trump, duke reflektuar vrullin në rritje në rajonet kryesore. Fitimet sugjerojnë se përpjekjet e fushatës së Trump në shtetet e lëkundura mund të rezultojnë efektive ndërsa ai ngushton hendekun me Harris. Ky sondazh ka një marzh të gabimit në kampionin prej +/-3 pikë përqindjeje.
Momenti i Trump
Të Premten, parashikimi popullor i Nate Silver konfirmoi zhvendosjen e momentit drejt Trump, duke vënë në dukje se shanset e tij për të fituar janë më të lartat që nga gushti. Modeli i përditësuar pasqyroi disa shifra të forta anketash në favor të Trump në shtetet vendimtare si Wisconsin, Michigan dhe Pennsylvania.
Parashikimet e fundit të Silver tregojnë se Trump ka një avantazh të lehtë në Kolegjin Zgjedhor, 50.2 përqind shanse për të fituar, krahasuar me 49.5 përqind të Harris – pavarësisht se Harris ka një shans 75 përqind për të fituar votën popullore.
Ndërsa simulimet e FiveThirtyEight favorizojnë gjithashtu Trumpin, modeli i jep atij një shans 52 nga 100 për të fituar, krahasuar me 48 nga 100 të Harris.
