Kryeminsitri Edi Rama, i pushtuar nga deliri i madhështisë, u ka treguar sot shqiptarëve se sa shumë ka vuajtur për ta, pasi duhet të qëndronte në këmbë vazhdimisht. Rama thotë se po sfidon edhe shkencën me sakrificat e tij për shqiptarët.
Duke folur në podkastin e realizuar me një ministre të tij, Rama tha se gjithçka po e bën për hir të integrimit.
“M’u desh të kryej një ndërhyrje kirurgjikale dhe të marr rrugët kundër shkencës, komplet, se duhet të qëndroja të paktën 3 ditë pushim, por ishin 3 ditë komplet të pamundura sepse të nesërmen duhet të rrija në këmbë për të pritur sulltanin, që vinte nga lindja, pastaj të nesërmen duhet të merrja rrugët në qendrën e ish-perandorisë hungareze për të takuar mikun tim Viktor Orban, që është dhe kryeministri i vendit që ka presidencën e BE, për ta falënderuar për gjithçka bëri Hungaria për këtë shtysë të fundit dhe pastaj duhet të shkonim së bashku dhe të uleshim më në fund në atë sofër si të barabartë që të fillonim të bisedonim.
Kjo bëri që nën efektin e disa injeksioneve shumë të forta, që kishin si pasojë qëndrimin pa gjumë për të shmangur dhimbjet, kam shëtitur pas shumë vitesh nëpër ekrane. Unë nuk i ndjek, dihet botërisht që nuk i ndjek debatet televizive, portalet, marr informacione shumë shkurt për informacionet më të rëndësishme, por kam pamundësi fizike që të mund të jem në gjendje për punë po të ndjek atë lemeri.
Por nga çfarë pashë në atë moment, kuptova që është e nevojshme që publiku të informohet sepse ka një mjegull, një keqkuptim, një përzierje llafesh”, tha Rama.
