Gjatë tensioneve në seancën e djeshme plenare në Kuvend, deputetja e PD-së, Elda Hoti hodhi një lëndë të lëngshme në tapetin e parlamentit dhe kryeparlamentarja Elisa Spiropali doli që në sekondë të parë në konkluzionin se ishte benzinë, ndërsa ministri i Brendshëm, Ervin Hoxha u hodh direkt në sulm se do e çonte në Prokurori për zjarrvënie të qëllimshme.
Por, më pas u mësua se ajo ishte thjesht një aromatizues dhe Policia e Tiranës, kur me urdhër të ministrit e procedoi penalisht, i ngriti akuzat për veprat penale “Kanosja” dhe “Shkelja e rregullave mbi lëndët helmuese”, të cilat mbetet mister se në cilat prova dhe fakte bazohet.
Por ndërkohë, ajo që ka tërhequr më shumë interesin, duket se janë pamjet e ministrit të Jashtëm, Igli Hasani, të cilat po bëjnë xhiron e rrjetit.
Deputetja demokrate e kishte vendosur lëndën e lëngshme në një shishe parfumi, e cila ka përfunduar në duart e Igli Hasanit, me siguri nga ministri i Brendshëm, Ervin Hoxha, të cilit do ia ketë dhënë Garda në kundërshtim me ligjin.
Në video shihet Hasani, teksa e “thith” fort me hundë rreth tre herë shishen e parfumit, për t’ia bërë ekspertizën ashtu siç duhet. Pas nuhatjes si “qen kufiri”, Hasani i pëshpërit diçka dhe ministrit Ulsi Manja, por ky i fundit sapo tenton për të afruar hundën drejt aromatizuesit e largon me shpejtësi, ndryshe nga ministri i Jashtëm i cili duket se nuk i ka problem erërat e këqija.
Nuk dihet nëse Policia ka dalë në konkluzionin për “lëndë helmuese” mbi ekspertizën e Igli Hasanit apo jo, por veprimi i tij mund të ngrejë dhe dyshime për prishje provash.
