Ka dëshmuar ditën e sotme për herë të parë në Gjykatën e Posaçme Ndrek Prenga, vëllai i Jan Prengës, i cili u rrëmbye Janarin e vitit 2020 në Kamëz dhe më pas ia zhdukën trupin.
Ai ka rrë fyer se në vitin 2020 ka qenë në burg në Londër të Anglisë, por çdo ditë kontaktonte me telefonin e burgut me familjarët e tij. Ai ka thënë se me vëllain e tij kishte folur rreth një javë përpara se ta rrëmbenin.
Ndërkohë, Ndrek Prenga ka rrëfyer para togave të zeza se para se ta rrëmbenin Jan Prengën, një person me ngjyrë i ka futur në dhomë një “Iphone” dhe e ka telefonuar me kamer një person me prefiks të huaj, duke iu prezantuar si Gentjan Funiqi me origjinë nga Dukagjini i Shkodrës.
Prenga ka deklaruar se Funiqi i ka thënë në telefon që: “Ma jep gjënë”. Sipas tij, telefonuesi i referohej një sasie prej 260 kilogramë kokaine që rezultonte e humbur dhe dyshohej të ishte vjedhur nga vëllai tjetër i tyre, Astrit Prenga së bashku me mikun e tyre të familjes, Gëzim Shullanin, një shtetas rumun dhe një shtetas shqiptar që quhet Xhulian.
Gjatë dëshmisë, Ngrek Prenga shtoi se Gentjan Funiqi, gjatë bisedave, i kishte thënë se kishte tentuar të komunikonte edhe me vëllain tjetër, Astritin, por nuk kishte arritur. Pas këtij mesazhi, Ndrek Prenga iu është përgjigjur se nuk ishte në dijeni se për çfarë bëhet fjalë.
Më pas, ai sqaroi se kishte arritur të telefononte Astritin, por edhe ky i fundit i ishte përgjigjur se nuk kishte dijeni se çfarë kishte ndodhur.
“Pas një apo dy ditësh jam njoftuar nga nusja se Jani është marrë peng dhe se pas kësaj, jam përpjekur të merrte vesh se çfarë ka ndodhur”, ka rrëfyer ai para togave të zeza.
Pas pak ditësh, Ndrek Prenga është vënë në dijeni se bëhet fjalë për një sasi prej 260 kg kokainë që ishte vjedhur në port dhe gjatë komunikimeve që ka pasur me Gentian Funiqin, ky i fundit i ka kërkuar që të dorëzojë atë “gjënë” duke iu referuar sasisë së kokainës me qëllim për të liruar pengun.
Ngrek Prenga tha se xhaxhai i tij dhe një person tjetër kanë shkuar në Shkodër për të takuar familjarët e Gentian Funiqit alias Gentian Doçit, ku kanë gjetur babin e tij. Por, ky i fundit i është përgjigjur se nuk kishte dijeni dhe përgjegjësi se çfarë bën djali i tij.
Ndrek Prenga shtoi se pas ndërprerjes së mesazheve me Gentian Funiqin (Doqin), me të cilin fliste edhe me kamera, një tjetër numër i ka shkruar duke iu prezantuar si Gramoz, i cili ka pretenduar se kokaina e vjedhur nga Astrit Prenga ishte e tija.
Sipas dëshmisë së Prengës, pasi policia ka ndërhyrë në kompleksin Golden në Shijak, nga ai moment ka ndërprerë komunikimet me të gjithë personat që kishte folur. Që nga mosha 13 vjeç, tregoi dëshmitari, është larguar nga Shqipëria dhe është shpërngulur në Britani ku ka ndërtuar jetën dhe ka dy djem.
Ngjarja:
Jan Prenga u rrëmbye janarin e vitit 2020 në Kamëz. Pas rrëmbimit ai u dërgua në kompleksin “Golden” në Shijak, në pronësi të Altin Hajrit, ku Festim Bixhdili punonte si ishte kopshtari.
Sipas pamjeve nga kamerat e sigurisë, Jan Prenga dyshohet se u dhunua për vdekje dhe asgjësimi i trupit ka dyshime se u bë në fshatin Pjezë, shumë pranë kompleksit, teksa kufoma ende nuk është gjetur.
Rrëmbimi erdhi pasi vëllai i Jan Prengës vodhi një kontejner me drogë në Britaninë e Madhe. Sipas SPAK, Festim Bexhdili e dinte vendin ku kanë groposur trupin e Jan Prengës, por nuk e tregon atë.
Sipas Prokurorisë së Posaçme, urdhri për rrëmbimin e Jan Prengës ishte dhënë nga Dritan (Gramoz) Rexhepi dhe i bashkëpandehuri i tij Gentian Funiqi (Doda), organizimi është bërë nga të pandehurit Martin Bleta e Korado Keshteja, ndërsa ekzekutimi i rrëmbimit është bërë nga të pandehurit Artan Doçaj, Aldo Majnishta, Geraldo Martini dhe një person tjetër i paidentifikuar.
Porosia për rrëmbimin e Jan Prengës u dha teksa Rexhepi ishte i burgosur në Ekuador, në Amerikën Latine dhe kishte si qëllim shtrëngimin e vëllait të Prengës, që kishte vjedhur një sasi kokaine të trafikuar nga Ekuadori në Angli. Familja Prenga zhvilloi edhe negociatat me rrëmbyesit dhe një pjesë e kokainës u dorëzua, por ndërkohë Jan Prenga kishte humbur jetën.
