Ministri i Jashtëm i Izraelit, Israel Katz, ka konfirmuar vdekjen e liderit të Hamasit, Yahya Sinwar.
Më herët, ushtria izraelite tha se po kontrollonte mundësinë që ai të ishte vrarë, ku janë kryer testet e ADN-së, shkruan BBC.
Katz tha në një deklaratë se “vrasësi masiv Yahya Sinwar, i cili ishte përgjegjës për masakrën dhe mizoritë e 7 tetorit, u vra sot nga ushtarët e IDF-së”.
Ai e quajti vdekjen e liderit të Hamasit një “arritje të madhe ushtarake dhe morale për Izraelin”.
“Eleminimi i Sinwarit krijon një mundësi për lirimin e menjëhershëm të pengjeve dhe një ndryshim të mundshëm që mund të çojë në një realitet të ri në Gaza – pa Hamasin dhe pa kontrollin iranian”, pohoi ministri.
Të dhënat dentare ndihmuan Izraelin të identifikonte trupin e liderit të vrarë të Hamasit, Yahya Sinwar, tha një zyrtar amerikan dhe ish-zyrtar i njohur me këtë çështje, përveç biometrikeve të tjera.
Ai u zgjodh udhëheqës i grupit pas vrasjes së Ismael Haniyehut në korrik, në një sulm të dyshuar izraelit në kryeqytetin iranian, Teheran. Para se të merrte udhëheqjen e Hamasit, Sinwar kishte drejtuar krahun e armatosur të grupit.
