Policia ka arrestuar një të ri, i cili akuzohet se një natë më parë ka djegur dy makina të parkuara në Kamëz. Në pranga është vënë shtetasi Paulin Doda, 26 vjeç, banues në Kamëz, për veprën penale “Shkatërrimi i pronës me zjarr”.
“Ky shtetas dyshohet se, ditën e djeshme rreth orës 03:45, në rrugën “Bavaria” ka djegur me lëndë djegëse benzinë, dy automjete të parkuara” – njofton Policia.
Burime për mediat bëjnë me dije se i riu, pasi është afruar te mjetet e parkuara të babë e bir, i ka spërkatur ato me benzinë dhe u ka vënë flakën.
Policia mundi të siguronte provat e para, për të mbërritur tek i dyshuari, teksa po shqyrton edhe pamje filmike nga kamerat e sigurisë.
Motivet e ngjarjes mbeten ende të panjohura dhe krimi është ende nën hetim aktiv nga ekspertët.
