Ka mbërritur anija e parë ushtarake nga Italia me refugjatë afrikanë në portin e Shëngjinit, e cila ishte nisur që prej të hënës nga brigjet e Lampedusas.
Siç shihet edhe në pamjet e mëposhtme, anija “Libra” po ankorohet në port dhe më pas do të nisin procedurat me refugjatët afrikanë të kapur në brigjet italiane
Kontigjenti i parë i refugjatëve që Italia nisi drejt Shëngjinit, është i përbërë nga 16 persona. Janë të gjithë meshkuj me origjinë nga Egjipti dhe Bangladeshi.
Fillimisht refugjatët do të vendosen në kampin pritës në Shëngjin dhe pas procedurave do të transferohen drejt Gjadrit. Aktualisht në kampin e pritjes në Shëngjin janë gati vetëm 400 nga 880 vende. Ditën e sotme ishte operacioni i parë dhe në ditët në vijim pritet të vijojë me grupet e tjera.
Marrëveshja Rama-Meloni parashikon strehimin në dy kampet në Shëngjin dhe Gjadër, të refugjatëve burra dhe të rinj (pasi gratë dhe të miturit qëndrojnë në Itali) nga vendet afrikane që kapen në ujërat ndërkombëtare nga autoritetet italiane.
Në kampin e parë pritet të bëhet verifikimi i të dhënave personale të refugjatëve, ndërsa në të dytën, ata duhet të qëndrojnë deri në përfundim të procedurave për azil. Të dy kampet parashikohet të jenë nën juridiksionin italian dhe ndërtimi dhe funksionimi i tyre do mbulohet financiarisht nga pala italiane.
Marrëveshja parashikon sjelljen në Shqipëri të 3 mijë refugjatëve në muaj, 36 mijë refugjatëve në vit, teksa është nënshkruar për 5 vite, me mundësi zgjatjen më tej me miratimin e të dy palëve.
Kampi është ndarë në disa seksione të veçanta, ku përfshihet edhe izolimi për personat që kryejnë krime apo seksioni i trajtimit procedurial para se të jepet apo refuzohet azili. Nëse refuzohet, emigrantët riatdhesohen në vendet e tyre.
