Aktivisti për mbrojtjen e të drejtave të njeriut Altin Hazizaj, ka deklaruar se hapja e Kampit të Shëngjinit ka ndodhur përtej logjikës dhe respektimit të të drejtave të njeriut, ka një mendjelehtësi nga autoritetet shqiptare.
I ftuar në News24, Hazizaj tha se kjo çështjes është trajtuar si një kthim borxhi ndaj Italisë, që shkon në atë vazhdën e kolonializmit jo vetëm italian, por europian, që vende si Shqipëria i trajtojnë si vende të Botës së 3-të.
Në këtë kuadër Hazizaj tha se po trajtohemi si një vend që do përdoret për të dekurajuar këta emigrantë.
“Ky nuk është një model italian, është një model i shpikur dhe testuar nga Australia, që i mban emigrantët për vite të tëra në kampet ku i strehon”, tha Hazizaj.
Ai tha se pavarësisht se kush e menaxhon territorin brenda për brenda, Shqipëria ka po aq përgjegjësi sa pala italiane. “Të dy vendet duhet të plotësojnë të gjitha standardet dhe ti respektojnë sa i takon të drejtave të njeriut”, tha aktivisti.
