Që prej shpalljes “non grata” të Sali Berishës, zyrtarët e Ambasadës së Britanisë së Madhe në Tiranë kishin ndërprerë marrëdhëniet me Partinë Demokratike, por duket se situata tashmë kanë ndryshuar.
Pas një kohe të gjatë, dy zyrtare të ambasadës britanike kanë shkuar në selinë blu, ku kanë zhvilluar një takim me drejtuesen e Departamentit të Marrëdhënieve me Jashtë, Ilda Zhulalin dhe drejtuesin e Këshillit Bashkiak të Tiranës, Ilir Alimehmetin.
Për vizitë ka shkuar diplomatja Shakira Birtwhistle, e cila ndjek çështjet politike në Ambasadën Britanike në Tiranë, teksa takimi ka zgjatur për rreth 60 minuta.
Lidhur me këtë takim ka ardhur një komunikatë dhe nga selia blu ku bëhet me dije mbi atë se çfarë është diskutuar mes dy palëve.
“Në takim u diskutua situata politike, ku përfaqësuesit e PD i përcollën qëndrimet mbi domosdoshmërinë për qeveri kujdestare me synim sigurimin e standardeve minimale për zgjedhjet e vitit 2025.
Kjo skemë e përdorur me sukses në Maqedoninë e Veriut mund dhe duhet të zbatohet në Shqipëri, si garanci minimale për zgjedhje garuese. Kjo përputhet dhe me dy rekomandimet prioritare të OSBE/ODIHR që kërkojnë marrjen e masave për keqpërdorimin e burimeve shtetërore si armë për tjetërsimin e votës dhe shitblerjen masive të votës përmes fondeve publike.
Përfaqësuesit e PD e informuam diplomaten britanike për sulmin politik të qeverisë ndaj opozitës, përmes burgosjes politike të Kryetarit të opozitës, Sali Berisha, nënkryetarit të Grupit Parlamentar, Ervin Salianji, anëtarit të Këshillit Kombëtar, Jamarbër Malltezi, dhe kërcënimit publik drejtuar kryetarit të Grupit Parlamentar, Gazment Bardhi.” – thuhet në njoftimin e PD-së.
Gjithashtu, demokratët bëjnë me dije se në fund të takimit është rënë dakord për shpeshtim të kontakteve mes Ambasadës Britanike dhe përfaqësuesve të PD.
