Pas shkarkimit të Loina Priftit, ish-drejtoreshës së “IdentiTek”, e cila i kishte caktuar vetes rrogë 15 mijë euro në muaj e që dyshohet për një sërë abuzimesh në detyrë, përfshi këtu edhe cënim të të të dhënave sensitive, ministri i Brendshëm, Ervin Hoxha, ka firmosur një tjetër shkarkim.
Së fundmi është shkarkuar edhe drejtori i Përgjithshëm i Gjendjes Civile, Vangjush Stavro. Vendimi është marrë për shkak të një ngërçi të krijuar me tenderin e mirëmbajtjes së Regjistrit Kombëtar të Gjendjes Civile. Një përplasje për çështje teknike e procedurale me Agjencinë Kombëtare të Shoqërisë së Informacionit (AKSH) e ka shtyrë Ministrin e Brendshëm të sakrifikojë vartësin e tij.
Natyrisht mes Linda Karçanajt e Vangjush Stavros, ky i fundit do të sakrifikohej për t’i hapur rrugë punëve sipas modelit që kërkon kupola e Rilindjes, shpesh duke shkelmuar ligjet e duke zhvatur ç’të munden. AKSH-i është një nga institucionet më hermetike e të përfolur për tendera të dyshimtë. Ish-zv.kryeministri Arben Ahmetaj e ka cilësuar këtë institucion si “kopshtin privat të Edi Ramës”. E sipas tij ekziston një përgjim ambiental me njerëz të Ramës për një aferë 43 milionë euro.
Vangjush Stavro u emërua në krye të Gjendjes Civile në pranverë të vitit 2021. Nuk dihet ende se kush do ta zëvendësojë, por sidoqoftë ky institucion mbetet me një rëndësi të posaçme sidomos kur kemi para vitin elektoral. Rama as kësaj radhe nuk do të heqë dorë nga vesi kriminal i patronazhimit të njerëzve, përfshi edhe shqiptarët e diasporës. Thënë këtë, do duhet një drejtues i sprovuar me praktika të tilla për të lehtësuar masakrën e ardhshme zgjedhore të pranverës 2025./ Lapsi.al
