Prokuroria e Tiranës ka dhënë pretencën për skandalin e “Tires”, të denoncuar nga një emision televiziv gjatë kohës së pandemisë në ambientet e spitalit “Shefqet Ndroqi”, ose Covid 2.
Bëhet fjalë për sanitaren Tire Alldervishi, e cila i mori 8 milion lekë të vjetra vajzës së një paciente, duke u hequr si infermiere. Pacientja 55-vjeçare ndërroi jetë pas 28 ditësh në spital, teksa “Tirja”, pavarësisht ryshfetit, jo vetëm që nuk kujdesej për të, por edhe e keqtrajtonte.
Organi i akuzës ka kërkuar dënimin e Tire Alldervishit me 7 vite burgim për kryerjen e veprës penale të “Mashtrimit” të kryer në bashkëpunim, më shumë se një herë dhe që ka sjellë pasoja të rënda.
Ndërkohë, prokurori i çështjes Bledar Valikaj ka kërkuar dhe nga 6 vite burgim secila për infermierët Sheqerije Koçi, Sidorela Çela, Erjola Jazxhi dhe Gylbra Halilaj, të cilat akuzohen si bashkëpunëtore të “Tires”. Mbi to rëndojnë akuzat për veprat penale “Mashtrim” me pasoja të rënda dhe “Shpërdorim detyre”.
Gjithashtu, 6 vite burgim është kërkuar edhe për sanitaren tjetër Rukije Hoxhaj. Vlen të theksohet fakti se në atë kohë “Tirja” u arrestua për vperën penale të korrupsionit, por më pas u lirua nga Gjykata duke i caktuar masën “arrest shtëpie”.
Rasti ishte tronditës për opinionin publik, ku u dëshmua me zë dhe me figurë për mënyrën se si trajtoheshin në spitalet shtetërore të infektuarit me Covid-19.
Procesi gjyqësor ka zgjatur në kohë, pasi është zhvilluar me gjykim të zakonshëm prej 2021-shit kur u zbulua skema me pacientët me Covid.
