Pas dy humbjeve radhazi ndaj Çekisë e Gjeorgjisë, Kombëtarja e Shqipërisë është rikthyer te fitorja në arenën evropianë, duke i kthyer “reston” gjeorgjianëve pas humbjes së “Kuqezinjve” në “Air Albania”, një muaj më parë.
Ndër protagonistët e fitores minimale, 1-0 ishin edhe Ylber Ramadani dhe kapiteni Ismajli, të cilët pas ndeshjes bënë edhe nga një koment për sfidën.
“Shkatërruesi” i Leçe, Ramadani, e vlerësoi goxha lart performancën e Kombëtares e më tej u ndal edhe te rastet e humbura nga “Kuqezinjtë”.
“Sot ndeshja ka qene me të vërtetë e mirë, kemi dhënë shpirtin në fushë nga i pari në fund. Në Çeki u dënuam në minutat e parë dhe ishte e vështirë të hynim në ritmin tonë. Sot ishte ndeshje ku treguam karakter dhe ia dolëm.
Unë për vete mendoj se gjithkush është i gatshëm të japë 100 përqind, nuk ka hatërmbetje, nuk kam parë asnjëherë hatërmbetje në grupin tonë. Jemi të bashkuar, secili kur futet kërkon të tregojë veten dhe kush u fut bëri shumë mirë.
Ta mbyllnim ndeshjen? Unë mendoj se kur ishim në kundërsulm me Jasirin, mund të kishim mbyllur ndeshjen se ishin disa raste që një ekip lë hapësira kur hidhet para. Jasiri kishte dy herë shanse, por më tha që ishte i lodhur dhe nuk e diskutova më shumë.
Unë të them të vërtetën, mendoj se në Pragë nuk kemi bërë shumë që të merrnim diçka. Por këto ditë kanë qenë them paksa të vështira sepse jemi kritikuar shumë. Por kjo kritikë na ka bërë mirë”,- theksoi “motorri” i mesfushës.
Nga ana tjetër Ardian Ismajli i cili ishte kapiteni i Kombëtares në këtë takim ishte i lumtur për reagimin e skuadrës në këtë sfidë të rëndësishme për ecurinë në Ligën e Kombeve ndërsa e cilësoi fitoren e sotme si ditën më të lumtur të jetës së tij.
Çelësi i fitores? Besimi, gjithmonë kemi pasur besim. Siç e thashë para ndeshjes që kemi ardhur për tre pikët, si na bënë gjeorgjianët atje e kishim ne mundësinë këtu. E bëmë dhe besoj se e kemi merituar plotësisht, Kjo na shtyn dhe na jep një motiv më të madh për ndeshjet e nëntorit që për ne janë si finale.
Për mua dhe familjen time besoj se kjo është dita më e lumtur e jetës time, të mbaj shiritin e të përfaqësoj shqiptarët anembanë botës. Normale që ka qenë një motivim shumë më i madh për mua sot. Sa i përket merkatos së janarit, të shohim, të vazhdojë kështu, ishalla kemi shëndetin se ka shumë ndeshje deri në janar dhe do të shohim se çfarë do të bëhet.
Ne jemi një grup dhe grupi e tregon në ndeshje dhe në rezultate sepse jemi kualifikuar në Europian dhe jemi në udhën e duhur këtu. Ne asnjëherë nuk kemi problem me asnjë, kush luan, luan. Të katërt, edhe Mihaj, një profesionist jashtëzakonisht i mirë, i cili ndonëse ka luajtur më pak, ka bërë jashtëzakonisht mirë. Kush luan nuk ka rëndësi, jemi skuadër dhe besoj se kjo është ajo që ka bërë që të arrijë në këto nivele Shqipëria. – tha ndër të tjera Ismajli.
